ഡാലസ്: ഇന്ത്യയില് നിന്ന് ദത്തെടുത്ത മൂന്നു വയസുകാരി ഷെറിന് മാത്യൂസിന്റെ കൊലപാതകക്കേസില് വളര്ത്തമ്മയായ മലയാളി നഴ്സ് സിനി മാത്യൂസിനെ വെറുതെ വിട്ടു. ഷെറിന്റെ മരണത്തില് സിനിക്ക് പങ്കുണ്ടെന്ന് അന്വേഷണ ഉദ്യോഗസ്ഥര്ക്ക് കണ്ടെത്താന് സാധിക്കാതിരുന്നതിനെ തുടര്ന്നാണ് സിനിയെ കുറ്റവിമുക്തയാക്കിയത്. എന്നാല് കേസില് മറ്റൊരു പ്രതിയായ സിനിയുടെ ഭര്ത്താവ് വെസ്ലി മാത്യൂസ് വിചാരണ നേരിടണം.
പുറത്തുവന്ന സിനി തന്റെ സ്വന്തം മകളെ കാണുന്നതിനുള്ള അവകാശവും പാസ്പോര്ട്ടും വീണ്ടെടുക്കണമെന്ന് ആവശ്യപ്പെട്ടതായി സിനിയുടെ അറ്റോര്ണി ഹീത്ത് ഹാരിസ് പറഞ്ഞു. താന് മോചിതയായത് ദൈവാനുഗ്രഹമാണെന്നും മകളുമായി സന്തോഷത്തോടെ ജീവിക്കാനാണ് ആഗ്രഹമെന്നും സിനി മാധ്യമങ്ങളോട് പറഞ്ഞു.
എന്നാല് ഭര്ത്താവിനെക്കുറിച്ച് പ്രതികരിക്കാന് സിനി തയാറായില്ല. അറസ്റ്റിലായതിനു പിന്നാലെ കുട്ടിയിലുള്ള ഇരുവരുടേയും അവകാശം എടുത്തു കളഞ്ഞിരുന്നു. അതുകൊണ്ടു തന്നെ സിനിക്ക് സ്വന്തം കുഞ്ഞിനെ കാണാന് ഉടന് സാധിക്കില്ല. ഇവരുടെ കുഞ്ഞ് ബന്ധുവിനൊപ്പമാണ് ഇപ്പോഴുള്ളത്.
2017 ഒക്ടോബറിലാണ് കേസിനാസ്പദമായ സംഭവമുണ്ടായത്. റിച്ചഡ്സണിലെ വീട്ടില് നിന്ന് ഷെറിന് മാത്യൂസിനെ കാണാതാവുകയും പീന്നിട് വീടിന് ഒരു കിലോ മീറ്റര് അകലെ കലുങ്കിനടിയില് മരിച്ച നിലയില് കണ്ടെത്തുകയുമായിരുന്നു. ഷെറിനെ വെസ്ലി ക്രൂരമായി മര്ദ്ദിച്ച കാര്യം ഡോക്ടര്മാര് സ്ഥിരീകരിച്ചിരുന്നു
