ആര്സിഎന് മേധാവി പാറ്റ് കുള്ളന് തിരഞ്ഞെടുപ്പില് മത്സരിക്കുന്നു
റോയല് കോളേജ് ഓഫ് നഴ്സിംഗ് (ആര് സി എന്) മേധാവിയായിരുന്ന പാറ്റ് കുള്ളന് തിരഞ്ഞെടുപ്പില് മത്സരിക്കുമെന്ന് റിപ്പോര്ട്ടുകള്. ഐറിഷ് റിപ്പബ്ലിക്കന് പാര്ട്ടിയെ പ്രതിനിധീകരിച്ച് ഫെര്മനാഗ്, സൗത്ത് ടൈറോണ് മണ്ഡലങ്ങളിലേക്കുള്ള സ്ഥാനാര്ത്ഥിയായാണ് പാറ്റ് കുള്ളന് മത്സരിക്കാന് ഒരുങ്ങുന്നത്.
തിരഞ്ഞെടുപ്പ് രാഷ്ട്രീയത്തിലേയ്ക്ക് പ്രവേശിക്കുന്നതിന്റെ ഭാഗമായി റോയല് കോളേജ് ഓഫ് നഴ്സിംഗിന്റെ നേതൃസ്ഥാനത്തുനിന്നും അവര് പടിയിറങ്ങി . 2021 മുതല് പാറ്റ് കുള്ളന് റോയല് കോളേജ് ഓഫ് നഴ്സിംഗ് ജനറല് സെക്രട്ടറിയും ചീഫ് എക്സിക്യൂട്ടീവും ആയിരുന്നു. ന്യായമായ ശമ്പളത്തിന് വേണ്ടി നഴ്സുമാരെ അണിനിരത്തി രാജ്യവ്യാപകമായി സമരം നടത്തിയതിന്റെ മുമ്പില് നിന്നത് പാറ്റ് കുള്ളന് ആയിരുന്നു.
രാജ്യത്തെ ആതുര സേവന രംഗത്ത് ജോലി ചെയ്യുന്ന നഴ്സുമാരെ പ്രതിനിധീകരിച്ചാണ് താന് മത്സരിക്കുന്നതെന്ന് അവര് വ്യക്തമാക്കി. വടക്കന് അയര്ലന്ഡിലെ കൗണ്ടി ടൈറോണില് നിന്നുള്ള കുള്ളന് 1985-ല് ആണ് രജിസ്റ്റര് ചെയ്ത നഴ്സായി യോഗ്യത നേടിയത് . പബ്ലിക് ഹെല്ത്ത് ഏജന്സിയിലെ നഴ്സിംഗ് ഡയറക്ടര് ഉള്പ്പെടെ വിവിധ മേഖലകളില് അവര് സേവനം അനുഷ്ടിച്ചിട്ടുണ്ട് . 2016-ല് അവര് ആര്സിഎന്നില് എത്തി . 2021-ല് ജനറല് സെക്രട്ടറിയായും ചീഫ് എക്സിക്യൂട്ടീവായും നിയമിക്കപ്പെടുന്നതിന് മുമ്പ് 2019-ല് ആര്സിഎന്നിന്റെ നോര്ത്തേണ് അയര്ലന്ഡ് ഡയറക്ടര് ആയിരുന്നു
. പാറ്റ് കുള്ളന് ആവശ്യപ്പെട്ടതിനെ തുടര്ന്ന് അവരുടെ പേരും മറ്റു വിവരങ്ങളും ആര്സിഎന് ഔദ്യോഗിക വെബ്സൈറ്റില് നിന്ന് നീക്കിയിരുന്നു. പാറ്റ് കുള്ളന്റെ തിരഞ്ഞെടുപ്പ് രാഷ്ട്രീയത്തിലേക്കുള്ള വരവില് നഴ്സിംഗ് സമൂഹവും വലിയ പ്രതീക്ഷയിലാണ്.
