യുകെയില് മലയാളി കുടിയേറ്റം ശക്തമായിട്ടു രണ്ടു പതിറ്റാണ്ട് പിന്നിട്ടു. മലയാളികള് യുകെയില് ധാരാളം എത്തിയെങ്കിലും അവിടെ ഏറ്റവും കൂടുതല് സംസാരിക്കുന്ന ഇംഗ്ലിഷ് ഒഴികെയുള്ള 10 ഭാഷകളുടെ കണക്കെടുക്കുമ്പോല് മലയാളം അതിലില്ല. പഞ്ചാബിയും ഉറുദുവും ഗുജറാത്തിയും ഉണ്ടുതാനും.
ഓഫിസ് ഫോര് നാഷനല് സ്റ്റാറ്റിക്സിന്റെ കണക്കുകള് പ്രകാരം യുകെയില് താമസിക്കുന്ന 4.1 ദശലക്ഷം ആളുകള്ക്ക് ഇംഗ്ലിഷ് മാതൃഭാഷയല്ല. പടിഞ്ഞാറന് ലണ്ടന്, സ്ലോ, സതാംപ്ടണ്, ബര്മിങാം, ലീഡ്സ് തുടങ്ങിയ സ്ഥലങ്ങളില് 6,12,000 പേര് സംസാരിക്കുന്ന പോളിഷ് ആണ് ഇംഗ്ലിഷ് ഇതര ഭാഷകളുടെ പട്ടികയില് ഒന്നാം സ്ഥാനത്തുള്ളത്. അഞ്ച് ലക്ഷം പേരോളം സംസാരിക്കുന്ന ഭാഷയായ റൊമാനിയന് ആണ് രണ്ടാം സ്ഥാനത്ത് ഉള്ളത്. മൂന്ന് ലക്ഷത്തോളം പേര് സംസാരിക്കുന്ന പഞ്ചാബിയാണ് മൂന്നാം സ്ഥാനത്ത് . ഏകദേശം 270,000 പേര് സംസാരിക്കുന്ന ഉറുദു നാലാം സ്ഥാനത്താണ്. ഉര്ദു സംസാരിക്കുന്ന ഭൂരിഭാഗം ആളുകളും സ്കോട്ലന്ഡ്, വെസ്റ്റ് മിഡ്ലാന്ഡ്സ്, മാഞ്ചസ്റ്റര്, ലീഡ്സ് എന്നിവിടങ്ങളിലാണ് താമസിക്കുന്നത്.
ബ്രിട്ടനിലെ പ്രധാന നഗരങ്ങളില് ഒന്നായ ലണ്ടനില് മാത്രം 300 ലധികം ഭാഷകള് സംസാരിക്കുന്ന ആളുകള് ഉണ്ടെന്നാണ് കണ്ടെത്തിയിരിക്കുന്നത്. സ്കോട്സ്, വെല്ഷ്, ഐറിഷ് ഗാലിക്, സ്കോട്ടിഷ് ഗാലിക്, കോര്ണിഷ് എന്നിവ ഉര്പ്പടെ യുകെയിലെ പ്രാദേശിക ഭാഷകര്ക്ക് പുറമേയാണ് ഇത്. പോര്ച്ചുഗീസ് (225,000), സ്പാനിഷ് (2,15,000), അറബി (2,04,000), ബംഗാളി (199,000), ഗുജറാത്തി (189,000), ഇറ്റാലിയന് (160,000) എന്നിവയാണ് ഇംഗ്ലിഷ് ഒഴികെ ബ്രിട്ടനില് ഏറ്റവും കൂടുതല് സംസാരിക്കുന്ന 10 ഭാഷകള്.
