യുകെയില് വെള്ളപ്പൊക്ക ദുരിതം വിതച്ച് മഴ തുടരുന്നു. കൂടുതല് മഴ പെയ്യുമെന്ന് മുന്നറിയിപ്പുകള് നല്കിയതോടെ വീണ്ടും വെള്ളപ്പൊക്കം ഉണ്ടാകുമെന്ന ആശങ്കയും ശക്തമായി. ഇതിന്റെ ഭാഗമായി ശക്തമായ മഴ പെയ്യുന്ന മേഖലകളില് മെറ്റ് ഓഫീസ് വെള്ളപ്പൊക്ക മുന്നറിയിപ്പ് നല്കി.
ഈസ്റ്റ് മിഡ്ലാന്ഡ്സിലും, ഈസ്റ്റ് ആംഗ്ലിയയിലും മഴ മൂലമുള്ള മഞ്ഞ ജാഗ്രതാ മുന്നറിയിപ്പാണ് മെറ്റ് ഓഫീസ് പുറപ്പെടുവിച്ചിരിക്കുന്നത്. മുന്നറിയിപ്പ് നല്കിയ മേഖളകളില് വീടുകളിലും, ബിസിനസ്സുകളിലും വെള്ളം കയറാനുള്ള സാധ്യതയുണ്ടെന്ന് കാലാവസ്ഥാ നിരീക്ഷകര് വ്യക്തമാക്കി.
വൈദ്യുതി ബന്ധം തകരാറിലാകാനും, മൊബൈല് ഫോണ് കവറേജ് ഉള്പ്പെടെ തടസ്സപ്പെടാനും സാധ്യതയുണ്ടെന്നാണ് സൂചന. ബസ്, ട്രെയിന് സര്വ്വീസുകളും ബാധിക്കപ്പെടും. റോഡില് മഴയും, വെള്ളപ്പൊക്കവും മൂലം യാത്രകള്ക്ക് കാലതാമസം നേരിടും.
മുന്നറിയിപ്പുള്ള മേഖലകളില് 30-40 എംഎം വരെ മഴയാണ് പ്രതീക്ഷിച്ചിരിക്കുന്നത്. 64 ചുവപ്പ് വെള്ളപ്പൊക്ക മുന്നറിയിപ്പുകളും, 157 ആംബര് വെള്ളപ്പൊക്ക അലേര്ട്ടുകളുമാണ് ഇംഗ്ലണ്ടില് നിലവിലുള്ളത്. മിഡ്ലാന്ഡ്സ്, ഈസ്റ്റ്, നോര്ത്ത് എന്നിവിടങ്ങളില് നദികളില് ജലനിരപ്പ് ഉയരാന് സാധ്യതയുണ്ട്. നോര്ത്ത് വെയില്സിലെ റിവര് ഡീ, റിവര് അലിന് നദികളിലും ആംബര് അലേര്ട്ട് നിലവിലുണ്ട്.
