യുകെയില് മഞ്ഞിനും, ഐസിനുമുള്ള ഗുരുതര കാലാവസ്ഥാ മുന്നറിയിപ്പ് പുറപ്പെടുവിച്ച് മെറ്റ് ഓഫീസ്. രാജ്യത്തേക്ക് തണുത്ത കാലാവസ്ഥ അരിച്ചിറങ്ങിയതോടെ താപനില -1 സെല്ഷ്യസിലേക്ക് താഴ്ന്നു. യുകെ ഹെല്ത്ത് സെക്യൂരിറ്റി ഏജന്സി പുറപ്പെടുവിച്ച അലേര്ട്ടുകള് ഞായറാഴ്ച രാവിലെ 9 മുതല് വ്യാഴാഴ്ച രാവിലെ 9 വരെ നീണ്ടുനില്ക്കും.
മെറ്റ് ഓഫീസ് രണ്ട് വ്യത്യസ്ത മഞ്ഞ ജാഗ്രതാ നിര്ദ്ദേശങ്ങളാണ് മഞ്ഞും, ഐസുമായി ബന്ധപ്പെട്ട് പുറപ്പെടുവിച്ചിട്ടുള്ളത്. ഇതില് ആദ്യത്തേത്ത് ഞായറാഴ്ച വൈകുന്നേരം 4 മുതല് നോര്ത്തേണ് സ്കോട്ട്ലണ്ടില് നിലവിലുണ്ടാകും, തിങ്കളാഴ്ച രാവിലെ 11 വരെ ഇതിന് പ്രാബല്യമുണ്ട്. ഉയര്ന്ന പ്രദേശങ്ങളില് 4 ഇഞ്ച് വരെ മഞ്ഞ് വീഴുമെന്നാണ് കരുതുന്നത്.
രണ്ടാമത്തെ മഞ്ഞ ജാഗ്രത തിങ്കളാഴ്ച രാവിലെ 10 മുതല് 24 മണിക്കൂര് നേരത്തേക്കാണ് നിലവിലുള്ളത്. നോര്ത്തേണ് ഇംഗ്ലണ്ടിലെയും, സതേണ് സ്കോട്ട്ലണ്ടിലെയും ഭാഗങ്ങളാണ് ഇതില് പെടുന്നത്. ഉയര്ന്ന പ്രദേശങ്ങളില് 8 ഇഞ്ച് വരെയും, താഴ്ന്ന ഭാഗങ്ങളില് 4 ഇഞ്ച് വരെയും മഞ്ഞിനാണ് സാധ്യത.
വരും ദിവസങ്ങളില് ഇംഗ്ലണ്ട്, സ്കോട്ട്ലണ്ട്, വെയില്സ്, നോര്ത്തേണ് അയര്ലണ്ട് എന്നിവിടങ്ങളിലെ ജനങ്ങള്ക്ക് കൊടുംതണുപ്പിനെ അഭിമുഖീകരിക്കേണ്ടി വരുമെന്നാണ് പ്രവചനം. മഞ്ഞ് വീഴുന്നതിനൊപ്പം, താപനില താഴാനും, ഐസ് നിറഞ്ഞ സാഹചര്യങ്ങള് രൂപപ്പെടാനും ഇത് ഇടയാക്കുമെന്ന് മെറ്റ് ഓഫീസ് വ്യക്തമാക്കുന്നു.
ഈ കാലാവസ്ഥാ വ്യത്യാസം സൗത്ത് ഇംഗ്ലണ്ടിലേക്കും പടരുമെന്നാണ് മെറ്റ് ഓഫീസ് നല്കുന്ന മുന്നറിയിപ്പ്. രാജ്യത്തിന്റെ നോര്ത്ത് ഭാഗങ്ങളില് 10 സെന്റിമീറ്റര് വരെ മഞ്ഞുവീഴ്ചയാണ് പ്രതീക്ഷിക്കുന്നത്.
റോഡുകളില് ഐസ് പാച്ചുകള് നേരിടേണ്ടി വരുമെന്നാണ് ജനങ്ങള്ക്ക് മുന്നറിയിപ്പ് നല്കിയിരിക്കുന്നത്. തണുപ്പ് തുടരുന്നതോടെ പവര്കട്ടിനും, ബസ്-ട്രെയിന് സര്വ്വീസുകള് തടസ്സപ്പെടാനും സാധ്യത രൂപപ്പെടും. നോര്ത്തേണ് സ്കോട്ട്ലണ്ടില് നിലവിലുള്ള മഞ്ഞ്, ഐസിനുള്ള മഞ്ഞ ജാഗ്രത തിങ്കളാഴ്ച രാവിലെ 11 വരെ തുടരും. രാവിലെ ഉയര്ന്ന പ്രദേശങ്ങളില് 10 സെന്റിമീറ്റര് വരെ മഞ്ഞിനാണ് സാധ്യത. താഴ്ന്ന പ്രദേശങ്ങളില് 1 മുതല് 3 സെന്റിമീറ്റര് വരെയാണ് മഞ്ഞുവീഴുക.
തിങ്കളാഴ്ച പുലര്ച്ചെ വരെ പൂജ്യത്തിന് താഴേക്കാണ് താപനില പോകുകയെന്നതിനാല് പകല് സ്ഥിതി ബുദ്ധിമുട്ടേറിയതായി മാറുമെന്ന് മെറ്റ് ഓഫീസ് വ്യക്തമാക്കി. നോര്ത്തേണ് ഇംഗ്ലണ്ടും, സ്കോട്ട്ലണ്ടും ഇതിന്റെ ബുദ്ധിമുട്ട് അറിയും. അതേസമയം സൗത്ത് ഇംഗ്ലണ്ടില് ഉയര്ന്ന താപനില രേഖപ്പെടുത്തും.
