യൂറോപ്പിലേക്ക് പ്രവേശിച്ച കൊടുങ്കാറ്റ് ഡരാഗ് ഇന്ന് ഉച്ചയോടെ യുകെയിലും ആഞ്ഞു വീശുമെന്നാണ് പ്രവചനം. ഡരാഗ് കൊടുങ്കാറ്റ് ശക്തമായ മഴയും, കാറ്റും എത്തിക്കുമെന്ന് ഉറപ്പായതോടെ ആംബര് കാലാവസ്ഥാ മുന്നറിയിപ്പ് പുറപ്പെടുവിച്ചിരിക്കുകയാണ് മെറ്റ് ഓഫീസ്. സീസണിലെ നാലാമത്തെ കൊടുങ്കാറ്റ് 80 മൈല് വരെ വേഗത്തിലുള്ള കാറ്റും, അതിശക്തമായ മഴയ്ക്കും ഇടയാക്കുമെന്നാണ് കരുതുന്നത്.
ഉച്ചതിരിഞ്ഞ് തുടങ്ങുന്ന മഴയും, കാറ്റും ആഴ്ചാവസാനത്തേക്കും നീളും. ഇതിനകം 130 വെള്ളപ്പൊക്ക അലേര്ട്ടുകള് പുറപ്പെടുവിച്ചിട്ടുണ്ട്. അടുത്ത ഏതാനും ദിവസത്തേക്ക് കൊടുങ്കാറ്റ് നിലയുറപ്പിക്കുമെന്ന് തിരിച്ചറിഞ്ഞതോടെയാണ് മെറ്റ് അപൂര്വ്വമായ ആംബര് മുന്നറിയിപ്പ് നല്കിയത്. രണ്ടാമത്തെ ഉയര്ന്ന അലേര്ട്ട് ലെവലാണിത്. ശനിയാഴ്ച രാവിലെ 9 മുതല് രാത്രി 9 വരെ വിനാശകരമായ 80 എംപിഎച്ച് കൊടുങ്കാറ്റ് ഇംഗ്ലണ്ടിലും, വെയില്സിലും വീശിയടിക്കുമെന്നാണ് ആശങ്ക.
കൂടുതല് വ്യാപകമായ നാശം വിയ്ക്കുമെന്നതിനാല് കൊടുങ്കാറ്റിന്റെ പാതയിലുള്ള ജനങ്ങള് സുരക്ഷിതരാകണമെന്ന് മുന്നറിയിപ്പ് അഭ്യര്ത്ഥിച്ചു. ശനിയാഴ്ച നോര്ത്തേണ് ഇംഗ്ലണ്ടിലെ മലനിരകളില് മഞ്ഞും വീഴും. നോര്ത്തേണ് അയര്ലണ്ടിലും, വെയില്സിലും മഴയ്ക്കുള്ള മഞ്ഞ മുന്നറിയിപ്പാണ് നല്കിയിരിക്കുന്നത്. ബെര്ട്ട് കൊടുങ്കാറ്റ് സൃഷ്ടിച്ച വെള്ളപ്പൊക്കം സാരമായി ബാധിച്ച ഇവിടെ വെള്ളിയാഴ്ച ഉച്ചതിരിഞ്ഞ് 3 മുതല് ശനിയാഴ്ച 12 വരെയാണ് മഴ മുന്നറിയിപ്പ്.
നവംബര് 27ന് കോണാള് കൊടുങ്കാറ്റും, നവംബര് 22ന് ബെര്ട്ട് കൊടുങ്കാറ്റും ബ്രിട്ടനില് നാശംവിതച്ച് കടന്നുപോയിരുന്നു. പുതിയ കൊടുങ്കാറ്റ് രൂപമെടുക്കുന്ന സാഹചര്യത്തില് റോഡ്, റെയില്, എയര്, ഫെറി സര്വ്വീസുകള് ബാധിക്കപ്പെടുമെന്നതിനാല് യാത്രാ തടസ്സം രൂപമെടുക്കുമെന്ന് കാലാവസ്ഥാ നിരീക്ഷകര് വ്യക്തമാക്കുന്നു. വീടുകളിലും, ബിസിനസ്സുകളിലും വെള്ളപ്പൊക്കം പ്രതിസന്ധി സൃഷ്ടിക്കാനും സാധ്യതയുണ്ട്.
മേല്ക്കൂരയില് നിന്നും ശക്തമായ കാറ്റില് ടൈലുകള് പറന്ന് പോകാന് ഇടയുണ്ട്. മഴയും, വെള്ളപ്പൊക്കവും റോഡിലൂടെ ഡ്രൈവിംഗ് ബുദ്ധിമുട്ടാക്കി മാറ്റിയേക്കാം. ചിലപ്പോള് റോഡുകള് അടച്ചിടാനും സാധ്യതയുണ്ടെന്നാണ് സൂചന. ഇതിന് പുറമെ പവര്കട്ട്, മൊബൈല് ഫോണ് കവറേജ് നഷ്ടമാകല് എന്നിവയും വന്നുചേരാം. തീരപ്രദേശങ്ങളില് ഉയര്ന്ന തിരമാല മൂലം പരുക്കേല്ക്കാനും, ജീവന് അപകടത്തിലാകാനും സാധ്യതയുണ്ടെന്നാണ് മുന്നറിയിപ്പ്.
