എസെക്സില് അഞ്ചുവയസ്സുകാരനായ ആണ്കുട്ടി കൊല്ലപ്പെട്ട സംഭവത്തില് ഒപ്പമുണ്ടായിരുന്ന യുവതിക്കെതിരെ കൊലപാതക കുറ്റം ചുമത്തി. 35 കാരിയായ സ്ത്രീക്കെതിരെ കൊലപാതക കുറ്റം ചുമത്തി. ഡിസംബര് 15 ഞായറാഴ്ച സൗത്ത് ഒക്കന്ഡണിലെ വിന്ഡ്സ്റ്റാര് ഡ്രൈവില് നടന്ന ഒരു സംഭവത്തെ തുടര്ന്ന് ആണ് അഞ്ചു വയസുകാരനായ ലിങ്കണ് ബട്ടണ് മരിച്ചതെന്ന് എസെക്സ് പോലീസ് അറിയിച്ചു.
കുട്ടിക്കും ഒരു സ്ത്രീക്കും ഗുരുതര പരിക്ക് പറ്റിയെന്ന വിവരത്തെ തുടര്ന്ന് പോലീസും പാരാമെഡിക്കലുകളും സംഭവസ്ഥലത്ത് എത്തിച്ചേരുകയായിരുന്നു. എന്നാല്, കുട്ടിയുടെ ജീവന് രക്ഷിക്കാന് പോലീസിന് സാധിച്ചില്ല.
ആശുപത്രിയില് പ്രവേശിപ്പിച്ച സ്ത്രീയുടെ നില മെച്ചപ്പെട്ടതിനെ തുടര്ന്ന് അവരെ ചോദ്യം ചെയ്തെന്ന് പോലീസ് അറിയിച്ചു. ഇതിനെ തുടര്ന്ന് സൗത്ത് ഒക്കന്ഡണിലെ വിന്ഡ്സ്റ്റാര് ഡ്രൈവിലെ ക്ലെയര് ബട്ടണ് നെതിരെ കൊലപാതക കുറ്റം ചുമത്തിയതായി എസെക്സ് പോലീസ് അറിയിച്ചു. വളരെ സങ്കീര്ണമായ ഒരു കേസ് ആണിതെന്ന് അന്വേഷണ ഉദ്യോഗസ്ഥനായ ഡിറ്റക്ടീവ് ചീഫ് ഇന്സ്പെക്ടര് അലന് ബ്ലെക്സ്ലി പറഞ്ഞു.
മരിച്ച കുട്ടിയും അറസ്റ്റിലായ സ്ത്രീയും തമ്മിലുള്ള ബന്ധം പോലീസ് വെളിപ്പെടുത്തിയിട്ടില്ല. എങ്കിലും കുട്ടിയെ കൊലപ്പെടുത്തി സ്ത്രീ ആത്മഹത്യാശ്രമം നടത്തിയതാകാമെന്നാണ് പ്രാഥമിക വിവരങ്ങള് സൂചിപ്പിക്കുന്നത്. ഓസ്ബോണ് കോ-ഓപ്പറേറ്റീവ് അക്കാദമി ട്രസ്റ്റിന്റെ ഭാഗമായ സൗത്ത് ഒക്കന്ഡണിലെ ബോണിഗേറ്റ് പ്രൈമറി സ്കൂളിലെ ഒന്നാം വര്ഷ വിദ്യാര്ത്ഥിയായിരുന്നു ലിങ്കണ്.
