ക്രിസ്മസ് രാത്രിയില് ബ്രിട്ടീഷ് രാജകുടുംബത്തിനായി കരോള് ഗാനം പാടി മലയാളി പെണ്കുട്ടി
ലണ്ടന്: ക്രിസ്മസ് രാത്രിയില് ബ്രിട്ടിഷ് രാജകുടുംബത്തിനായി കരോള് ഗാനം പാടി മലയാളി പെണ്കുട്ടിയും. പ്രിന്സസ് കെയ്റ്റ് ആതിഥ്യം വഹിച്ച റോയല് കരോള് സന്ധ്യയിലാണ് കണ്ണൂര് അങ്ങാടിക്കടവ് സ്വദേശി സെറ റോസ് സാവിയോ (4) പങ്കെടുത്തത്. ചര്ച് ഓഫ് ഇംഗ്ലണ്ടിന്റെ റോം എന്ന വിശേഷിപ്പിക്കുന്ന വെസ്റ്റ് മിനിസ്റ്റേഴ്സ് അബിയില് 24ന് രാത്രിയായിരുന്നു കരോള് പരിപാടി. പ്രിന്സസ് ഓഫ് വെയില്സ് ആയ കെയ്റ്റ് രാജകുമാരിയുടെ പ്രത്യേക ക്ഷണം ലഭിച്ചാണ് ചെസ്റ്ററിലെ 'സാങ്കോഫ സോങ്ക്സ്റ്റേഴ്സ്' എന്ന ഗായക സംഘം കരോള് പരിപാടിയില് എത്തിയത്. ഈ ഗായക സംഘത്തിലെ ഏറ്റവും പ്രായം കുറഞ്ഞ ഗായികയാണ് നാലുവയസ്സുകാരി സെറ. ബിലോങ് ചെസ്റ്റര് കെയര് വില്ലേജിലെ നാലു മുതല് 100 വയസ്സുവരെ പ്രായമുള്ള 30 പേരാണ് 'സാങ്കോഫ സോങ്ക്സ്റ്റേഴ്സ്' എന്ന ഗായക സംഘത്തിലുള്ളത്.
ചെസ്റ്ററിലെ നഴ്സറി ഇന് ബിലോങ്ങിലാണ് സെറ പഠിക്കുന്നത്. ചെസ്റ്ററിലെ ഓള് സെയിന്റ്സ് പള്ളിയിലായിരുന്നു സംഘത്തിന്റെ ക്വയര് പരിശീലനം. എല്ലാ വര്ഷവും വിവിധ പരിപാടികളില് കരോള് ഗാനവും പാടുന്ന സംഘത്തെ ഇത്തവണ റോയല് ക്രിസ്മസ് കാരളിലേക്ക് പ്രിന്സസ് ക്ഷണിക്കുകയായിരുന്നു. രണ്ടുവര്ഷമായി ഗായക സംഘത്തിന്റെ ഭാഗമാണ് സെറ. പരസ്പര സഹകരണത്തിന്റെയും സ്നേഹത്തിന്റെയും സന്ദേശവുമായാണ് 'സാങ്കോഫ സോങ്ക്സ്റ്റേഴ്സ്' കാരള് ഗാന പരിപാടിയില് പങ്കെടുത്തത്. വില്യം രാജകുമാരനും പ്രിന്സസ് കാതറിനും കുടുംബമായി പരിപാടി കാണാനെത്തിയിരുന്നു. കരോള് പരിപാടിക്ക് ശേഷം എല്ലാവര്ക്കും പ്രത്യേക ക്രിസ്മസ് സമ്മാനവും നല്കിയാണ് രാജകുടുംബം ഗായക സംഘത്തെ യാത്രയാക്കിയത്. ഇംഗ്ലണ്ടില് എല്ലാ വര്ഷവും നടക്കുന്ന റോയല് കരോള് പരിപാടി ബിബിസി ലൈവായി സംപ്രേക്ഷണം ചെയ്തിരുന്നു. ഇംഗ്ലണ്ട് ചെസ്റ്ററില് അക്കൗണ്ടന്റായ സാവിയോ ജോസിന്റെയും നഴ്സായ അരുണ ബേബിയുടെയും മകളാണ് സെറ.
