ബര്ലിന്: ഇന്ത്യയുള്പ്പടെ 57 രാജ്യങ്ങളിലെ നഴ്സുമാര്ക്ക് ജര്മനിയിലെവിടെയും കുടിയേറി ജോലി ചെയ്യാന് ജര്മന് സര്ക്കാരിന്റെ അനുമതി. പുതിയ ഉത്തരവനുസരിച്ച് ഇന്ത്യക്കാര്ക്ക് ജര്മനിയിലെ നഴ്സിംഗ് മേഖലയില് ജോലിചെയ്യാനുണ്ടായിരുന്ന നിരോധനം (ജര്മനിയിലുള്ള ഇന്ത്യക്കാര്ക്ക് നിരോധനം ബാധകമല്ലായിരുന്നു) ഇല്ലാതായി.
നിലവില് ഇന്ത്യയില് നിന്നുള്ള നഴ്സുമാര്ക്ക് ജര്മനിയില് ജോലിചെയ്യാനുള്ള വര്ക്ക് പെര്മിറ്റ് നല്കില്ലായിരുന്നു. അതേസമയം, 2012 ഏപ്രില് മുതല് ജര്മനിയിലെ ബാഡന്വ്യുര്ട്ടംബര്ഗ് സംസ്ഥാനം ഇന്ത്യയിലെ ബിഎസ്സി നഴ്സിംഗ് അംഗീകരിച്ച് ഈ സംസ്ഥാനത്ത് മാത്രം ജോലിചെയ്യാന് അനുമതി നല്കിയിരുന്നു. എന്നാലിപ്പോള് ഇന്ത്യക്കാരായ നഴ്സുമാര്ക്ക് ജര്മനിയില് എവിടെവേണമെങ്കിലും ജോലിചെയ്യാനുള്ള അനുവാദമാണ് മെര്ക്കല് മന്ത്രിസഭയിലെ തൊഴില്- സാമൂഹ്യക്ഷേ മന്ത്രിയായ ഉര്സുല ഫോണ് ഡെര് ലയേന് ഇറക്കിയിരിക്കുന്ന ഉത്തരവിലൂടെ ലഭ്യമായിരിക്കുന്നത്. 2006 ലേയും 2008 ലേയും തൊഴില് നിയമങ്ങളില് ഭേദഗതി വരുത്തിക്കൊണ്ടള്ള ഉത്തരവാണ് പുതിയതായി ഇറക്കിയത്. ഇതോടെ കേരളത്തില് നിന്നുള്ള നഴ്സുമാര്ക്ക് ജര്മനിയിലേയ്ക്കു കുടിയേറാനുള്ള സുവര്ണാവസരമാണ് ഉണ്ടായിരിക്കുന്നത്.
അതേസമയം, ജര്മനിയില് നഴ്സുമാരെ റിക്രൂട്ട് ചെയ്യാന് ഇടനിലക്കാരെയോ ഏജന്റുമാരെയോ സര്ക്കാരോ മറ്റു മന്ത്രാലയങ്ങളോ ഏര്പ്പെടുത്തിയിട്ടില്ലെന്നതും ശ്രദ്ധേയമാണ്. നഴ്സിംഗ് പാസായിട്ടുള്ള ആര്ക്കും വര്ക്ക് പെര്മിറ്റിനായി നേരിട്ട് അപേക്ഷ നല്കാം. ജര്മന് എംപ്ളോയ്മെന്റ് എക്സ്ചേഞ്ച് മുഖേനയോ, ഇന്ത്യയിലെ ജര്മന് എംബസി മുഖേനയോ നേരിട്ട് ബന്ധപ്പെടേണ്ടതാണ്. നഴ്സുമാര്ക്ക് കുടിയേറാന് അവസരം നല്കിയിട്ടുള്ള 57 രാജ്യങ്ങളില് ഏഷ്യയില് നിന്ന് ഇന്ത്യയെ കൂടാതെ പാകിസ്താന്, ബംഗ്ളാദേശ്, ഭൂട്ടാന്, അഫ്ഗാനിസ്ഥാന്, ഇന്തോനീഷ്യ എന്നിവയും ആഫ്രിക്കന് രാജ്യങ്ങളുമാണുള്ളത്.
ഉത്തരവനുസരിച്ച് തൊഴില് വാഗ്ദാനം നല്കി ഇടനിലക്കാരായും ഏജന്റുമാരായും പ്രവര്ത്തിക്കുന്നത് കുറ്റകരവും ജയില്ശിക്ഷാര്ഹവുമാണ്. ജര്മന് കുടിയേറ്റം വാഗ്ദാനം ചെയ്ത് നിരവധി ഏജന്സികള് പൊട്ടിമുളയ്ക്കാനുള്ള സാധ്യത മുന്നിര്ത്തി അധികൃതര് ഇക്കാര്യത്തില് പ്രത്യേക ജാഗ്രതാ നിര്ദേശവും നല്കിയിട്ടുണ്ട്.
തൊഴില് തേടി ജര്മനിയിലേയ്ക്കു കുടിയേറണമെങ്കില് ജര്മന് ഭാഷാപരിജ്ഞാനം അത്യാവശ്യമാണ്. ജര്മന് ഭാഷ എഴുതാനും വായിക്കാനും പറയാനും കഴിവുണ്ടായിരിയ്ക്കണം. നിലവില് ജര്മന് ഭാഷാടെസ്റ്റിന്റെ ബി 2 പരീക്ഷ പാസായിരിക്കണം.
