റാംസ്ഗേറ്റ്: ഗ്രേറ്റ് ബ്രിട്ടണ് സീറോ മലബാര് രൂപതയില് ശുശ്രുഷ ചെയ്യുന്ന എല്ലാ വൈദികരുടെയും സമ്മേളനം ഇന്ന് മുതല് റാംസ്ഗേറ്റിലുള്ള ഡിവൈന് ധ്യാനകേന്ദ്രത്തില്വച്ചു നടക്കും. തിങ്കളാഴ്ച ഉച്ചയ്ക്ക് 12: 30 ന് ആരംഭിക്കുന്ന സമ്മേളനം രൂപതാധ്യക്ഷന് മാര് ജോസഫ് സ്രാമ്പിക്കല് നിര്വ്വഹിക്കും. രൂപതയുടെ വിവിധ ഇടവക, മിഷന്, പ്രോപോസ്ഡ് മിഷന് കേന്ദ്രങ്ങളില് ശുശ്രുഷചെയ്യുന്ന വൈദികര് മൂന്നു ദിവസത്തെ ഈ സമ്മേളനത്തില് സംബന്ധിക്കും.
അദിലാബാദ് രൂപതാ മെത്രാന് മാര് പ്രിന്സ് ആന്റണി പാണേങ്ങാടന് സമ്മേളനത്തില് ക്ളാസ്സുകള് നയിക്കും. ബൈബിള് വിജ്ഞാനീയത്തില് അഗാധ പാണ്ഡിത്യമുള്ള അദ്ദേഹത്തിന്റെ ക്ലാസുകള് സമ്മേളനത്തില് പങ്കെടുക്കുന്നവര്ക്ക് മുതല്ക്കൂട്ടാകും. അദിലാബാദ് രൂപതയുടെ മെത്രാനായി സ്ഥാനമേറ്റതുമുതല് രൂപതയ്ക്ക് നവമായ മിഷന് ചൈതന്യം പകര്ന്നുകൊടുക്കാന് അദ്ദേഹത്തിന് സാധിച്ചിട്ടുണ്ട്. ഇക്കഴിഞ്ഞ കേരള മെത്രാന് സിനഡിന് മുന്നോടിയായി മെത്രാന്മാരുടെ ധ്യാനം നയിച്ചതും മാര് പ്രിന്സ് ആന്റണി പാണേങ്ങാടാനായിരുന്നു.
സമ്മേളനത്തില് പങ്കെടുക്കാനെത്തുന്ന വൈദികര്, വി. കുര്ബാനയര്പ്പണത്തിനാവശ്യമായ തങ്ങളുടെ തിരുവസ്ത്രങ്ങള് കൊണ്ടുവരണമെന്ന് രൂപതാ പ്രോട്ടോ സിഞ്ചെല്ലൂസ് റെവ. ഡോ. ആന്റണി ചുണ്ടെലിക്കാട്ട് അറിയിച്ചു. വൈദികസമ്മേളനം നടക്കുന്ന ഈ ദിവസങ്ങളില് ദൈവജനം മുഴുവനും രൂപതയിലെ എല്ലാ വൈദികര്ക്കുമായി പ്രാര്ത്ഥിക്കണമെന്നു രൂപതാധ്യക്ഷന് മാര് ജോസഫ് സ്രാമ്പിക്കല് അഭ്യര്ത്ഥിച്ചു. സമ്മേളനം ബുധനാഴ്ച സമാപിക്കും.
സമ്മേളനം നടക്കുന്ന റാംസ്ഗേറ്റ് ഡിവൈന് ധ്യാനകേന്ദ്രത്തിന്റെ പോസ്റ്റ് കോഡ്: CT11 9PA.
