മാഞ്ചസ്റ്റര് സെന്റ്.മേരീസ് ക്നാനായ മിഷനില് അമലോത്ഭവ മാതാവിന്റെ പ്രധാന തിരുന്നാളും സണ്ഡേ സ്കൂള് വാര്ഷികവും ഒക്ടോബര് 12 ന്
മാഞ്ചസ്റ്റര് : യൂറോപ്പിലെ ആദ്യത്തെ ക്നാനായ മിഷനായ സെന്റ്.മേരീസ് മിഷനില് ഇടവകയുടെ പ്രധാനപ്പെട്ട തിരുന്നാളായ ഇടവക മദ്ധ്യസ്ഥയായ അമലോത്ഭവ മാതാവിന്റെ തിരുന്നാള് ഒക്ടോബര് 12 ന് ശനിയാഴ്ച രാവിലെ 10 മണിക്ക് നോര്ത്തേന്ഡണിലെ സെന്റ്. ഹില്ഡാസ് ദേവാലയത്തില് ഭക്തിപൂര്വ്വം ആഘോഷിക്കും. കോട്ടയം അതിരൂപതയുടെ സഹായ മെത്രാന് മാര് ജോസഫ് പണ്ടാരശ്ശേരി മുഖ്യകാര്മ്മികനാകുന്ന തിരുനാള് കുര്ബാനയില് ഗ്രേറ്റ് ബ്രിട്ടന് രൂപതാ വികാരി ജനറാളും മിഷന് ഡയറക്ടറുമായ മോണ്സിഞ്ഞോര് ഫാ. സജി മലയില് പുത്തന്പുരയില്, രൂപതാ വികാരി ജനറാള് മോണ്സിഞ്ഞോര് ഫാ.ആന്റണി ചുണ്ടൈലിക്കാട്ട് യു കെയില് സേവനമനുഷ്ടിക്കുന്ന ക്നാനായ വൈദികര്, മാഞ്ചസ്റ്ററിലുള്ള മറ്റ് സീറോ മലബാര് വൈദികര് തുടങ്ങിയവര് സഹകാര്മികരാകും.
രാവിലെ 9.30ന് ജോസഫ് പണ്ടാരശ്ശേരി പിതാവിനേയും വൈദികരെയും മുത്തുക്കുടകളുടെയും വാദ്യമേളങ്ങളുടെയും അകമ്പടിയോടെ ദേവാലയത്തിലേക്ക് സ്വീകരിച്ചാനയിക്കുന്നതോടെ ആഘോഷമായ പൊന്തിഫിക്കല് ദിവ്യബലിക്ക് തുടക്കമാകും. മാഞ്ചസ്റ്റര് ക്നാനായ മിഷനിലെ ജോസ് പടപുരയ്ക്കലിന്റെയും റോയ് മാത്യുവിന്റേയും നേതൃത്വത്തിലുള്ള ഗായക സംഘം ദിവ്യബലിയില് ഗാനങ്ങള് ആലപിക്കും. ദിവ്യബലിക്ക് ശേഷം ആഘോഷമായ പ്രദിക്ഷണം നടക്കും. പൊന്നിന് കുരിശും വെള്ളിക്കുരിശും പതാകകളും മുത്തുക്കുടകളുമേന്തിയും വാദ്യമേളങ്ങളുടെയും ഐറിഷ് ബാന്ന്റിേേന്റയും അകമ്പടിയോടെ പരിശുദ്ധ അമലോത്ഭ മാതാവിന്റേയും മറ്റ് വിശുദ്ധരുടേയും തിരുസ്വരൂപങ്ങളും വഹിച്ചുകൊണ്ടുള്ള നഗരവീഥികളിലൂടെയുള്ള ആഘോഷമായ പ്രദിക്ഷണം നടക്കും. പ്രദക്ഷിണം തിരികെ ദേവാലയത്തില് പ്രവേശിച്ച ശേഷം വാഴ് വും സമാപന ആശീര്വാദവും നടക്കുന്നതോടെ തിരുന്നാളിന് സമാപനം കുറിക്കും. അമ്പ് എഴുന്നള്ളിക്കുന്നതിനും, അടിമ വയ്ക്കുന്നതിനുമുള്ള സൗകര്യവും ഉണ്ടായിരിക്കുന്നതാണ്.
തിരുനാളിനോടനുബന്ധിച്ചുള്ള 10 ദിവ സത്തെ ജപമാലയാചരണവും ആരാധനയും ഒക്ടോബര് മൂന്നാം തീയ്യതി (വ്യാഴം) മുതല് പീല് ഹാളിലുള്ള സെന്റ്. എലിസബത്ത് ദേവാലയത്തില് വൈകുന്നേരം 7 മണിക്ക് നടത്തപ്പെടും. ഓരോ ദിവസത്തെയും വി.കുര്ബാനയും ജപമാലയും മിഷനിലെ വിവിധ കൂടാരയോഗങ്ങളുടെ നേതൃത്വത്തിലാണ് ക്രമീകരിച്ചിരിക്കുന്നത്. തിരുനാളിന്റെ പ്രസുദേന്തി വാഴ്ച ഒക്ടോബര് ആറാം തീയ്യതി സെന്റ്. എലിസബത്ത് ദേവാലയത്തില് വൈകുന്നേരം 4.30 ന് ദിവ്യബലിയോടുനുബന്ധിച്ച് നടക്കും.
പെരുനാളിന്റെ വിജയത്തിനായി ട്രസ്റ്റിമാരുടെയും പാരീഷ് കൗണ്സില് അംഗങ്ങളുടെയും കൂടാരയോഗങ്ങളുടെയും നേതൃത്വത്തിലുള്ള വിവിധ കമ്മിറ്റികള് പ്രവര്ത്തിച്ച് വരുന്നു.
തിരുന്നാളിന് ശേഷം ഉച്ചകഴിഞ്ഞ് രണ്ട് മുതല് വിഥിന്ഷോ ഫോറം സെന്ററില് സണ്ഡേ സ്കൂള് വാര്ഷികവും ഇടവക ദിനാഘോഷവും നടക്കും. കോട്ടയം അതിരൂപതാ സഹായമെത്രാന് മാര് ജോസഫ് പണ്ടാരശ്ശേരില് വാര്ഷികാഘോഷങ്ങള് ഉദ്ഘാടനം ചെയ്യും. സണ്ഡേ സ്കൂള് കുട്ടികള് മുതിര്ന്നവര്, മിഷനിലെ മറ്റ് ഭക്ത സംഘടനകളുടെയും നേതൃത്വത്തില് വിവിധ കലാപരിപാടികള് ഉണ്ടായിരിക്കും.
മാഞ്ചസ്റ്ററില് നടക്കുന്ന തിരുനാളില് സംബന്ധിച്ച് മാതാവില് നിന്നും പ്രത്യേകം അനുഗ്രഹം പ്രാപിക്കുവാന് മാഞ്ചസ്റ്ററിലും പരിസരങ്ങളിലും താമസിക്കുന്ന എല്ലാ വിശ്വാസികളെയും സ്വാഗതം ചെയ്യുന്നതായി ഇടവക വികാരി ഫാ.സജി മലയില് പുത്തന്പുരയില് അറിയിച്ചു.
