ജാപ്പനീസ് ആഡംബരക്കപ്പലിലെ 10 യാത്രക്കാര്ക്ക് കൊറോണ; കപ്പല് പിടിച്ചിട്ടു
യോക്കോഹാമ: ജാപ്പനീസ് ആഡംബരക്കപ്പലിലെ 10 യാത്രക്കാര്ക്ക് കൊറോണ സ്ഥിരീകരിച്ചതിനെ തുടര്ന്ന് കപ്പലിലെ നാലായിരത്തോളം സഞ്ചാരികളേയും ജീവനക്കാരേയും ക്വാറന്റൈന് ചെയ്തു. ജാപ്പനീസ് ആഡംബരക്കപ്പലായ ഡയമണ്ട് പ്രിന്സസ് ക്രൂയിസിലെ പത്ത് യാത്രക്കാര്ക്ക് ആണ് കൊറോണ ബാധ സ്ഥിരീകരിച്ചത്. ജപ്പാനിലെ യോക്കോഹാമ തുറമുഖത്ത് പിടിച്ചിട്ടിരിക്കുന്ന കപ്പലിലുള്ളവരെ പുറത്തിറങ്ങാന് അനുവദിച്ചിട്ടില്ല.
3700 സഞ്ചാരികളും ജീവനക്കാരുമാണ് കപ്പലിലുള്ളത്.
ഹോങ്കോങ് തുറമുഖത്ത് കപ്പലിറങ്ങിയ യാത്രക്കാരന് കൊറോണ സ്ഥിരീകരിച്ചതിനെ തുടര്ന്നാണ് കപ്പലിലുള്ള 273 പേരുടെ സാംപിളുകള് പരിശോധിച്ചത്. പത്തോളം പേര്ക്ക് കൊറോണ സ്ഥിരീകരിച്ചതായി അധികൃതര് അറിയിച്ചു. കപ്പലിലെ എല്ലാവരേയും പരിശോധനയ്ക്ക് വിധേയമാക്കുമെന്ന് അധികൃതര് അറിയിച്ചു. കഴിഞ്ഞ മാസം ഇതേ കപ്പലില് യാത്രക്കാരനായിരുന്ന ഹോങ്കോങ് സ്വദേശിയായ എണ്പതുകാരനാണ് വൈറസ് സ്ഥിരീകരിച്ചത്. യാത്രയ്ക്കിടെ ഇയാള്ക്കു രോഗലക്ഷണങ്ങളൊന്നും പ്രത്യക്ഷപ്പെട്ടിരുന്നില്ല. എന്നാല് ജനുവരി 25ന് ഹോങ്കോങില് തിരിച്ചെത്തിയതിനു പിന്നാലെ ലക്ഷണങ്ങള് പ്രകടമായതോടെ ഇയാള് ആശുപത്രിയിലെത്തി പരിശോധന നടത്തുകയായിരുന്നു.
14 ദിവസത്തെ നിരീക്ഷണമാണ് കപ്പലിലെ യാത്രക്കാര്ക്ക് ഏര്പ്പെടുത്തിയിരിക്കുന്നത്. യോക്കോഹാമ തുറമുഖത്ത് പിടിച്ചിട്ടിരിക്കുന്ന കപ്പലില് നിന്നും കൊറോണ സ്ഥിരീകരിച്ചവരെ ഉടനെ സ്ഥലത്തെ ആശുപത്രികളിലേക്ക് മാറ്റുമെന്ന് അധികൃതര് പറഞ്ഞു. കപ്പലിലെ മറ്റു യാത്രക്കാരെ നിരീക്ഷണത്തിലാക്കേണ്ട സ്ഥിതിയാണ്.
