ബെര്ലിന്: ജര്മനിയിലെ ഹനാവു നഗരത്തിലെ രണ്ട് ബാറുകളില് രാത്രിയുണ്ടായ വെടിവെയ്പ്പില് എട്ട് മരണം. ഗുരുതരമായി പരിക്കേറ്റ അഞ്ച് പേരെ ആശുപത്രിയില് പ്രവേശിപ്പിച്ചു. ബുധനാഴ്ച രത്രി പത്ത് മണിയോടെയാണ് ഹനാവുവിലെ ബാറില് ആദ്യം വെടിവെയ്പ്പ് നടന്നത്. ഇവിടെ മൂന്ന് പേര് കൊല്ലപ്പെട്ടു. ഇതിന് പിന്നാലെ മറ്റൊരു ബാറിലുണ്ടായ വെടിവെയ്പ്പില് അഞ്ച് പേരും കൊല്ലപ്പെട്ടു. സംഭവശേഷം രക്ഷപ്പെട്ട പ്രതികളെ ഇതുവരെ പിടികൂടാനായിട്ടില്ല.
വെടിവെപ്പ് നടന്ന സ്ഥലങ്ങളില് നിന്നും ഇരുണ്ട നിറത്തിലുള്ള കാറില് കയറി പ്രതികള് രക്ഷപ്പെട്ടു എന്നാണ് ദൃക്സാക്ഷികള് പറയുന്നത്. പ്രതികളെക്കുറിച്ചോ ഇവരുടെ ഉദ്ദേശത്തെക്കുറിച്ചോ പൊലീസിന് ഇതുവരെ വിവരങ്ങളൊന്നും ലഭിച്ചിട്ടില്ല. പ്രതികള്ക്ക് വേണ്ടി വ്യാപകമായ അന്വേഷണമാണ് നടത്തുന്നതെന്ന് ജര്മന് പൊലീസ് അറിയിച്ചു.
ജര്മനിയിലെ പ്രധാന ഒത്തുകൂടല് കേന്ദ്രങ്ങളാണ് ഹുക്കാ ബാറുകള്. സായാഹ്നങ്ങളും രാത്രികളും ചിലവഴിക്കാന് നിരവധി പേരാണ് ഇത്തരം ബാറുകളില് ദിവസവും എത്തിച്ചേരാറുള്ളത്. ഇത്തരം ബാറുകളെ ലക്ഷ്യമാക്കി നടന്ന ആക്രമണത്തെ തുടര്ന്ന് ഹനാവു നഗരത്തിലാകെ കനത്ത സുരക്ഷയാണ് അധികൃതര് ഒരുക്കിയിട്ടുള്ളത്.
