ഒട്ടാവ: കാനഡ പ്രധാനമന്ത്രി ജസ്റ്റിന് ട്രൂഡോയുടെ ഭാര്യ സോഫി ഗ്രിഗോയറിന് കൊറോണ വൈറസ് ബാധ സ്ഥിരീകരിച്ചു. ഇന്ന് രാവിലെയാണ് രോഗം സ്ഥിരീകരിച്ചതായി ഫലം വന്നത്. യുകെയില് നിന്ന് മടങ്ങിയ ഭാര്യയില്കൊറോണ വൈറസ് ലക്ഷണങ്ങള് പ്രത്യക്ഷപ്പെട്ടതിനു പിന്നാലെ ജസ്റ്റിന് ട്രൂഡോ ഐസൊലേഷനിലായിരുന്നു. ബുധനാഴ്ച വൈകിട്ടോടെയാണ് ജസ്റ്റിന് ട്രൂഡോയുടെ ഭാര്യ സോഫിയില് കൊറോണ ലക്ഷണങ്ങള് പ്രത്യക്ഷപ്പെട്ടത്. ഇതിന്റെ പശ്ചാത്തലത്തില്, പരിശോധനാഫലം വരുന്നതുവരെ ഇരുവരും വീട്ടില് ഐസൊലേഷനില് കഴിയാന് തീരുമാനിച്ചതായി പ്രധാനമന്ത്രിയുടെ ഓഫീസ് നേരത്തെ അറിയിച്ചിരുന്നു. സോഫിയെ ആശുപത്രിയിലേയ്ക്ക് മാറ്റിയെന്നാണ് വിവരം.
യു.കെയില് നടന്ന ഒരു പരിപാടിയില് സോഫി പങ്കെടുത്തിരുന്നു. ഇതിനു പിന്നാലെയാണ് കൊറോണയുടെ ലക്ഷണങ്ങള് പ്രത്യക്ഷപ്പെട്ടത്. അതേസമയം ജസ്റ്റിന് ട്രൂഡോയില് ലക്ഷണങ്ങള് ഇതുവരെ പ്രത്യക്ഷപ്പെട്ടില്ല.
ഡോക്ടറുടെ നിര്ദേശപ്രകാരം ട്രൂഡോ ആരോഗ്യകാര്യങ്ങളില് ശ്രദ്ധനല്കുന്നുണ്ടെന്നും ദൈനംദിന പ്രവൃത്തികളില് ഏര്പ്പെടുന്നുണ്ടെന്നും അദ്ദേഹത്തിന്റെ ഓഫീസ് വ്യക്തമാക്കി. മുന്കരുതല് എന്ന നിലയിലാണ് അദ്ദേഹം വീട്ടില്ക്കഴിഞ്ഞുകൊണ്ട് ജോലി ചെയ്യുന്നതെന്നും ഓഫീസ് അധികൃതര് കൂട്ടിച്ചേര്ത്തു. അടുത്ത രണ്ടുദിവസങ്ങളില് പ്രവിശ്യ പ്രീമിയര്മാരും ഫസ്റ്റ് നേഷന്സ് നേതാക്കളുമായി ജസ്റ്റിന് ട്രൂഡോ നടത്താനിരുന്ന യോഗങ്ങള് റദ്ദാക്കിയിട്ടുണ്ട്. ഇതുവരെ കാനഡയില് 103ഓളം പേര്ക്കാണ് കൊറോണ സ്ഥിരീകരിച്ചിട്ടുള്ളത്.
