ആസ്ട്രാസെനക വാക്സിന് ഉപയോഗം താത്കാലികമായി ഡെന്മാര്ക്കും നോര്വേയും ഐസ്ലന്ഡും നിര്ത്തിവെച്ചു. കുത്തിവെപ്പെടുത്തവരില് ചിലരില് രക്തം കട്ടപിടിക്കുന്നതായി കണ്ടതിനെ തുടര്ന്നാണ് തീരുമാനം. ചെവ്വാഴ്ചവരെ 22 പേര്ക്കാണ് രക്തം കട്ടപിടിച്ചതായി റിപ്പോര്ട്ട് ചെയ്തത്. പ്രതിരോധ കുത്തിവെപ്പ് താല്ക്കാലികമായി നിര്ത്തി വെച്ച വിവരം ഡെന്മാര്ക്ക് ആരോഗ്യ മന്ത്രാലയമാണ് അറിയിച്ചത്. ഡെന്മാര്ക്കിനു പിന്നാലെ എസ്തോണിയ, ലാത്വിയ, ലിത്വാനിയ, ലക്സംബര്ഗ് തുടങ്ങിയ യൂറോപ്യന് രാജ്യങ്ങളും വാക്സിന് ഉപയോഗം താല്ക്കാലികമായി നിര്ത്തി നിര്ത്തിവെച്ചു.
കൂടാതെ, വാക്സിനെടുത്ത 49 വയസുകാരി നഴ്സിന്റെ മരണത്തെത്തുടര്ന്ന് ആസ്ട്രാസെനക യുടെ പ്രത്യേക ബാച്ചിലുള്ള വാക്സിന് കുത്തിവെപ്പ് നിര്ത്തിവെച്ചതായി ഓസ്ട്രിയ കഴിഞ്ഞദിവസം അറിയിച്ചിരുന്നു.
ബ്ലഡ് ക്ലോട്ട് രൂപപ്പെട്ട സംഭവത്തില് അന്വേഷണം പ്രഖ്യാപിച്ച യൂറോപ്യന് യൂണിയന് നടപടിക്ക് പിന്നാലെ വാക്സിനെ പിന്തുണച്ച് ബോറിസ് ജോണ്സണ് രംഗത്തെത്തി. വാക്സിന് സുരക്ഷിതമാണെന്ന് ആവര്ത്തിക്കുകയാണ് ബോറിസ് ജോണ്സണ്. ബ്രിട്ടനിലെ ജനങ്ങള് വാക്സിന് എടുക്കുന്നത് തുടരണം. 'വാക്സിന് സുരക്ഷിതവും, ഫലപ്രദവുമാണെന്ന കാര്യം വ്യക്തമാണ്. വാക്സിന് എടുക്കാന് ആവശ്യപ്പെടുമ്പോള് ജനങ്ങള് ഇതിനായി മുന്നോട്ട് വരണം. വാക്സിന് പ്രോഗ്രാമിന്റെ ഫലമായി രാജ്യത്ത് മരണസംഖ്യയും, ആശുപത്രി അഡ്മിഷനും, കേസുകളും കുറയുന്നത് കാണാം', ബോറിസിന്റെ വക്താവ് പറഞ്ഞു.
