ഡല്ഹി: കോവിഡ് പ്രതിസന്ധിയില് ഇന്ത്യയില് കുടുങ്ങിപ്പോയ ഓസ്ട്രേലിയക്കാരെ തിരിച്ചെത്തിക്കാനായി ഇന്ത്യയില് നിന്നും പുറപ്പെടുന്ന ആദ്യ വിമാനത്തില് ബുക്ക് ചെയ്ത പകുതിയോളം പേര്ക്കും കൊറോണ. ഇതോടെ ഇവരുടെ തിരിച്ച് വരവ് പ്രതിസന്ധിയിലായി. ആദ്യ വിമാനത്തില് യാത്രക്ക് മുമ്പ് നടത്തിയ കോവിഡ് സ്ക്രീനിംഗില് 70 യാത്രക്കാര് പരാജയപ്പെടുകയും 40 ല് അധികം പേര്ക്ക് പോസിറ്റീവാണെന്ന് കണ്ടെത്തുകയും ചെയ്തതിനെ തുടര്ന്നാണ് ഇവരുടെ തിരിച്ച് വരവിന് തടസമുണ്ടായിരിക്കുന്നത്.
ശേഷിക്കുന്ന 30 പേര് കോവിഡ് ബാധിതരുടെ അടുത്ത കുടുംബാംഗങ്ങളോ അവരുമായി സമ്പര്ക്കത്തിലായവരോ ആണ് ഇവരെയും വിമാനത്തില് കയറ്റാനാവില്ലെന്നാണ് റിപ്പോര്ട്ട്.
ഇതോടെ ആദ്യ വിമാനത്തില് പകുതിയോളം സീറ്റുകള് കാലിയാകും. ഇതിലേക്ക് തിരക്ക് പിടിച്ച് യാത്രക്കാരെ കണ്ടെത്താന് സാധിക്കാത്തതിനാല് ആദ്യ വിമാനം പാതി സീറ്റുകളില് യാത്രക്കാരുമായായിരിക്കും ലാന്ഡ് ചെയ്യുന്നത്.
ഇന്ത്യയില് നിന്നുള്ള വിമാനയാത്രാ നിരോധനം മേയ് 15ന് ഓസ്ട്രേലിയ പിന്വലിച്ച ശേഷമെത്തുന്ന പ്രഥമ ക്വാന്റാസ് വിമാനത്തിലെ യാത്രക്കാര്ക്കാണീ ദുര്ഗതിയുണ്ടായിരിക്കുന്നത്. ഈ വിമാനം മേയ് 15ന് ഡാര്വിനിലാണ് ലാന്ഡ് ചെയ്യുന്നത്.
നാട്ടുകാരെ തിരിച്ച് കൊണ്ടു വരുന്നതിനുളള നീക്കങ്ങള് ഓസ്ട്രേലിയ നിലവില് നടത്തിവരുകയാണ്. എന്നാല് ഇന്ത്യയിലെ കോവിഡ് വ്യാപനം അതിനു വലിയ വെല്ലുവിളിയാവുകയാണ്.
ഓസ്ട്രേലിയന് മലയാളികളുടെ നാട്ടിലേക്കും തിരിച്ചുമുള്ള യാത്രയും അനിശ്ചിതത്വത്തിലായി.
