ഹെല്സിങ്കി: ലോകത്തെ ഏറ്റവും സന്തോഷമുള്ള രാജ്യമെന്ന പദവി തുടര്ച്ചയായ അഞ്ചാംതവണയും ഫിന്ലന്ഡ് നിലനിര്ത്തി. ഐക്യരാഷ്ട്രസഭ വെള്ളിയാഴ്ച പുറത്തുവിട്ട സന്തോഷസൂചികയില് ഡെന്മാര്ക്കാണ് രണ്ടാംസ്ഥാനത്ത്. വടക്കന് യൂറോപ്യന് രാജ്യങ്ങളായ ഐസ്ലന്ഡ്, സ്വിറ്റ്സര്ലന്ഡ്, നെതര്ലന്ഡ്സ്, ലക്സംബര്ഗ് രാജ്യങ്ങള് ആദ്യ ആറുസ്ഥാനങ്ങളില് ഉള്പ്പെട്ടു. ബ്രിട്ടന് പതിനേഴാം സ്ഥാനത്താണ്.
പട്ടികയില് ഇന്ത്യയുടെ സ്ഥാനം 136-ാമതാണ്. കഴിഞ്ഞവര്ഷത്തില്നിന്ന് മൂന്നുസ്ഥാനം മെച്ചപ്പെടുത്തിയെന്നുമാത്രം. മൂന്നുസ്ഥാനം മെച്ചപ്പെടുത്തി യു.എസ് പതിനാറാമതെത്തി. കാനഡ പതിനഞ്ചും ഫ്രാന്സ് ഇരുപതും സ്ഥാനത്താണ്. യുദ്ധം തകര്ത്ത അഫ്ഗാനിസ്താനാണ് 146 രാജ്യങ്ങള് ഉള്പ്പെടുന്ന പട്ടികയില് അവസാനസ്ഥാനത്ത്. ലെബനന് (145), സിംബാബ്വെ (144), റുവാന്ഡ (143), ബോട്സ്വാന (142) എന്നിവയാണ് പട്ടികയിലെ മറ്റു അവസാനരാജ്യങ്ങള്.
കോവിഡ് ആരംഭിക്കുന്നതിന് മുമ്പും ശേഷവും സാമൂഹികമാധ്യമങ്ങളിലെ പ്രതികരണങ്ങളെക്കുറിച്ച് വിദഗ്ധര് പഠനം നടത്തി. 18 രാജ്യങ്ങളിലുള്ളവരില് ഉത്കണ്ഠ, ദുഃഖം എന്നിവയില് വര്ധനയുണ്ടായി. എന്നാല്, ദേഷ്യം പ്രകടിപ്പിക്കുന്നതില് കുറവുണ്ടായതായും സൂചിക വ്യക്തമാക്കുന്നു.
