ബ്രസല്സ്: ഖത്തര് ലോകകപ്പില് ഗ്രൂപ്പ് ഘട്ട മത്സരത്തില് ദുര്ബലരായ മൊറോക്കോയ്ക്കെതിരേ പരാജയം ഏറ്റുവാങ്ങിയതിന് പിന്നാലെ ബെല്ജിയത്തിന്റെ തലസ്ഥാനമായ ബ്രസല്സില് ആരാധകരുടെ അഴിഞ്ഞാട്ടം. കിരീട പ്രതീക്ഷയുമായി എത്തിയ ലോക രണ്ടാം റാങ്കുകാരുടെ വീഴ്ചയില് കുപിതരായാണ് ആരാധകര് അക്രമം അഴിച്ചുവിട്ടത്. മത്സരം പൂര്ത്തിയായതിന് പിന്നാലെ ആരാധകര് കടകളും മറ്റും തകര്ക്കുകയും വാഹനങ്ങള്ക്ക് തീയിടുകയും ചെയ്തു. നിരവധി പേര്ക്ക് പരിക്കേറ്റതായും റിപ്പോര്ട്ടുണ്ട്.
ആക്രമികള്ക്കെതിരേ പോലീസ് ജലപീരങ്കിയും കണ്ണീര്വാതകവും പ്രയോഗിച്ചു. അക്രമം വ്യാപിക്കാതിരിക്കാനായി മെട്രോ സ്റ്റേഷനുകള് അടച്ചിട്ടു. റോഡുകളില് ഗതാഗത നിയന്ത്രണമേര്പ്പെടുത്തുകയും ചെയ്തിട്ടുണ്ട്.
ജനക്കൂട്ടം പടക്കം പൊട്ടിക്കുന്നതിനിടെ ഒരു മാധ്യമപ്രവര്ത്തകന്റെ മുഖത്ത് പരിക്കേറ്റു. അക്രമം നിയന്ത്രണ വിധേയമാകുന്നതുവരെ നഗരമധ്യത്തിലേക്ക് വരരുതെന്ന് ബ്രസല്സ് മേയര് ഫിലിപ്പ് ക്ലോസ് മുന്നറിയിപ്പ് നല്കി.
എതിരില്ലാത്ത രണ്ട് ഗോളുകള്ക്കാണ് ഫിഫ റാങ്കിങ്ങില് 22-ാം സ്ഥാനത്തുള്ള മൊറോക്കോ രണ്ടാം റാങ്കിലുള്ള ബെല്ജിയത്തെ തകര്ത്തത്. ഇതോടെ ബെല്ജിയത്തിന്റെ പ്രീ ക്വാര്ട്ടര് സാധ്യതകള് മങ്ങി. ആദ്യ മത്സരത്തില് ബെല്ജിയം കാനഡയെ തോല്പ്പിച്ചിരുന്നു. നിലവില് ഗ്രൂപ്പ് എഫില് രണ്ട് മത്സരങ്ങളില് മൂന്ന് പോയിന്റുമായി ബെല്ജിയം മൂന്നാം സ്ഥാനത്താണ്.
