ക്നാനായ കാത്തലിക് മിഷന്സ് യുകെയുടെ പ്രവര്ത്തനങ്ങളെ പ്രോത്സാഹിപ്പിക്കുന്നതിനും മിഷന് ഇടവകയിലെ കുടുംബങ്ങളെ നേരില്കണ്ട് ആശയ വിനിമയം നടത്തുന്നതിനും ക്നാനായ കാത്തലിക് മിഷന് പ്രതിനിധി സംഗമത്തെ അഭിസംബോധന ചെയ്യുന്നതിനും ആയി എത്തുന്ന മാര് ജോസഫ് പണ്ടാരശ്ശേരിക്ക് ഇന്ന് മാഞ്ചസ്റ്റര് എയര്പോര്ട്ടില് ഉജ്ജ്വല സ്വീകരണം നല്കും.
ഗ്രേറ്റ് ബ്രിട്ടന് സീറോ മലബാര് രൂപത വികാരി ജനറല് ഫാ സജി മലയില് പുത്തന്പുര, സെന്റ് മേരിസ് ക്നാനായ മിഷന് അസിസ്റ്റന്റ് ഡയറക്ടര് ഫാ അജു എന്നിവരുടെ നേതൃത്വത്തില് മാഞ്ചസ്റ്റര് സെന്റ്മേരിസ് ക്നാനായ മിഷന് , ലിവര്പൂള് സെന്റ് പയസ് ടെന്ത് മിഷന് എന്നിവിടങ്ങളിലെ കൈകാരന്മാരും പാരിഷ് കൗണ്സില് അംഗങ്ങളും വേദപാഠ പ്രതിനിധികളും ചേര്ന്ന് മാഞ്ചസ്റ്റര് എയര്പോര്ട്ടില് മാര് ജോസഫ് പണ്ടാരശ്ശേരി പിതാവിന് സ്വീകരണം നല്കും.
കൊച്ചു പിതാവിന്റെ മിഷന് സന്ദര്ശത്തെ ഇടവക അംഗങ്ങള് ആവേശത്തോടെയാണ് ഉറ്റു നോക്കുന്നത്. മാര് ജോസഫ് പണ്ടാരശ്ശേരിയുടെ സന്ദര്ശനവുമായി ബന്ധപ്പെട്ട് ഓരോ മിഷനുകളിലും വിവിധതരത്തിലുള്ള സ്വീകരണ പരിപാടികളാണ് ഒരുക്കിയിരിക്കുന്നത്.. ശനിയാഴ്ച മാഞ്ചസ്റ്ററിലും ലിവര്പൂളിലും ആണ് മാര് ജോസഫ് പണ്ടാരശ്ശേരിയുടെ ഒരു മാസം നീണ്ടുനില്ക്കുന്ന മിഷന് ഇടവക സന്ദര്ശനം ആരംഭിക്കുന്നത്. ഡിസംബര് 17ന് ഹോളി ഫാമിലി ക്നാനായ കാത്തലിക് മിഷന് സ്കോട്ട് ലാന്ഡ് ആണ് ഇടവക സന്ദര്ശനം സമാപിക്കുന്നത്.
ഡിസംബര് 9ന് നടത്തപ്പെടുന്ന മിഷന് പ്രതിനിധികളുടെ വിശേഷാല് സമ്മേളനത്തെയും മാര് ജോസഫ് പണ്ടാരശ്ശേരി അഭിസംബോധന ചെയ്യും. ക്രിസ്തുമസ്സിനു മുന്നോടിയായി കൊച്ചു പിതാവിന്റെ സന്ദര്ശനം കണക്കിലെടുത്തു ഓരോ മിഷന് കളിലെയും അംഗങ്ങള് പ്രാര്ത്ഥനാപൂര്വ്വം കൊച്ചു പിതാവിനെ സ്വീകരിക്കാന് ഒരുങ്ങുകയാണ്.
