കൈവെട്ട് കേസിലെ ഒന്നാം പ്രതി സവാദ് 13 വര്ഷത്തിനുശേഷം പിടിയില്
കൊച്ചി: മതനിന്ദ ആരോപിച്ച് തൊടുപുഴ ന്യൂമാന് കോളജ് മലയാളം അധ്യാപകനായിരുന്ന ടി.ജെ.ജോസഫിന്റെ കൈവെട്ടിയ കേസിലെ ഒന്നാം പ്രതിയും പിടികിട്ടാപ്പുള്ളിയുമായ അശമന്നൂര് നൂലേലി മുടശേരി സവാദ് (38) കണ്ണൂരില് പിടിയില്. ദേശീയ അന്വേഷണ ഏജന്സിയാണ് (എന്ഐഎ) സവാദിനെ പിടികൂടിയത്. ഇന്നലെ വൈകിട്ട് കണ്ണൂര് മട്ടന്നൂരില് നിന്നാണ് സവാദ് എന്ഐഎയുടെ വലയിലായതെന്നാണ് ലഭിക്കുന്ന വിവരം. മുഖ്യപ്രതി പിടിയിലായതിനെ പൗരന് എന്ന നിലയില് നിയമവ്യവസ്ഥയുടെ വിജയമായി കാണുന്നുവെന്ന് പ്രഫ.ടി.ജെ. ജോസഫ് പ്രതികരിച്ചു. ഇരയെന്ന നിലയില് തനിക്ക് ഇതില് പ്രത്യേകിച്ച് ഒരു ഭാവവുമില്ലെന്നും അദ്ദേഹം പ്രതികരിച്ചു.
കുറ്റകൃത്യം നടന്ന 2010 ജൂലൈ 4നു ആലുവയില് നിന്നു സവാദ് ബെംഗളൂരുവിലേക്കു കടന്നതായി അന്ന് കേസന്വേഷിച്ച ക്രൈംബ്രാഞ്ച് കണ്ടെത്തിയിരുന്നു. എന്നാല് 13 വര്ഷം രഹസ്യാന്വേഷണ വിഭാഗങ്ങള് നടത്തിയ അന്വേഷണത്തിനും സവാദിനെ കണ്ടെത്താനായിരുന്നില്ല. സവാദിനെ കണ്ടെത്താനുള്ള സാധ്യത വിരളമാണെന്ന് കരുതിയിരിക്കെയാണ് കണ്ണൂരില്നിന്ന് ഇയാള് പിടിയിലായത്. കേരള പൊലീസ് അന്വേഷിച്ചിരുന്ന കേസ് 2011 മാര്ച്ചിലാണ് എന്ഐഎ ഏറ്റെടുത്തത്.
സവാദിനെ കണ്ടെത്താന് സഹായിക്കുന്നവര്ക്കാണ് ദേശീയ അന്വേഷണ ഏജന്സി കഴിഞ്ഞ വര്ഷം മാര്ച്ചില് 10 ലക്ഷം രൂപ പാരിതോഷികം പ്രഖ്യാപിച്ചിരുന്നു. ആദ്യം നാലു ലക്ഷം രൂപ പാരിതോഷികം പ്രഖ്യാപിച്ചെങ്കിലും സൂചനകളൊന്നും ലഭിക്കാതിരുന്ന സാഹചര്യത്തിലാണ് തുക 10 ലക്ഷമാക്കി ഉയര്ത്തിയത്. 54 പ്രതികളുള്ള കേസില് മറ്റുപ്രതികളുടെ വിചാരണ പൂര്ത്തിയാക്കി. ഒന്നാംഘട്ടത്തില് വിചാരണ നേരിട്ട 18 പ്രതികളെ കോടതി വിട്ടയച്ചിരുന്നു.
സവാദിനെ വിദേശത്തു കണ്ടതായുള്ള രഹസ്യവിവരത്തെ തുടര്ന്ന് എന്ഐഎ അന്വേഷണം ശക്തമാക്കിയിരുന്നു. നയതന്ത്രപാഴ്സല് സ്വര്ണക്കടത്തു കേസില് കസ്റ്റംസ് അറസ്റ്റ് ചെയ്ത പ്രതികളില് ഒരാളും ദുബായിയില് സവാദിനെ കണ്ടതായി മൊഴി നല്കിയിരുന്നു. ഇന്ത്യന് ചാരസംഘടനയായ റോയുടെ ഏജന്റുമാരുള്ള പാക്കിസ്ഥാന്, ദുബായ് എന്നിവിടങ്ങളില് സവാദിനെ കണ്ടെത്താനായി അരിച്ചുപെറുക്കിയിരുന്നു. അഫ്ഗാനിസ്ഥാന്, നേപ്പാള്, മലേഷ്യ എന്നിവിടങ്ങള് കേന്ദ്രീകരിച്ചും എന്ഐഎ അന്വേഷണം നടത്തിയെങ്കിലും ഫലമുണ്ടായില്ല. സവാദ് സിറിയയിലേക്കു കടന്നതായി പ്രചാരുണ്ടായെങ്കിലും അതിനും തെളിവു ലഭിച്ചില്ല.
കേസിലെ കൂട്ടുപ്രതികളുമായും സംഭവത്തിനു ശേഷം സവാദ് ബന്ധപ്പെട്ടിരുന്നില്ല. കേസില് കേരള പൊലീസിന്റെ ക്രൈംബ്രാഞ്ച് വിഭാഗം അന്വേഷണം നടത്തിയ ആദ്യഘട്ടത്തില് സവാദിനെ ബെംഗളൂരുവില് നിന്നു കര്ണാടക പൊലീസ് കസ്റ്റഡിയിലെടുത്തതായി സൂചനയുണ്ടായിരുന്നെങ്കിലും ഇതുസംബന്ധിച്ച സ്ഥിരീകരണം പിന്നീടുണ്ടായില്ല. നേപ്പാളില് ഏറെക്കാലം ഒളിവില് താമസിച്ച പ്രതി എം.കെ.നാസറിനൊപ്പം സവാദുണ്ടെന്നായിരുന്നു നാട്ടിലുള്ള അടുത്ത ബന്ധുക്കളുടെയും സുഹൃത്തുക്കളുടെയും അനുമാനം. എന്നാല് നാസര് കീഴടങ്ങിയ ശേഷം വിശദമായി ചോദ്യം ചെയ്യപ്പെട്ടെങ്കിലും സവാദിനെ സംബന്ധിച്ച വിവരം അന്വേഷണ സംഘത്തിനു ലഭിച്ചില്ല.
കുറ്റകൃത്യം നടന്ന 2010 ജൂലൈ നാലിനു സവാദിനെ അവസാനമായി കണ്ടതു കേസില് കഴിഞ്ഞ വര്ഷം ശിക്ഷിക്കപ്പെട്ട കൂട്ടുപ്രതി സജിലായിരുന്നു. അധ്യാപകന്റെ കൈവെട്ടാന് ഉപയോഗിച്ച മഴുവുമായാണു സവാദ് അന്നു കടന്നുകളഞ്ഞത്. ക്രൈംബ്രാഞ്ചിനും എന്ഐഎക്കും ഈ മഴുവും ഇതുവരെ വീണ്ടെടുക്കാന് കഴിഞ്ഞിട്ടില്ല. ആക്രമണത്തിനിടയില് സവാദിനു ചെറിയതോതില് പരുക്കേറ്റിരുന്നു. പരുക്കുമായി സവാദ് ആലുവ വരെ എത്തിയതിനു തെളിവുണ്ടെങ്കിലും അവിടെ നിന്ന് എങ്ങോട്ടാണു നീങ്ങിയതെന്നു സംഘത്തിലെ മറ്റുള്ളവര്ക്കും അറിയില്ലായിരുന്നു.
ബെംഗളൂരുവില് സവാദ് ചികിത്സ തേടിയ നഴ്സിങ് ഹോമില് നിന്നു കര്ണാടക പൊലീസ് കസ്റ്റഡിയിലെടുത്തെന്നാണ് അന്നു പുറത്തുവന്ന വാര്ത്ത. എന്നാല് അന്നത്തെ അന്വേഷണ സംഘം ഇക്കാര്യം നിഷേധിച്ചിരുന്നു.
