യു.കെ.വാര്‍ത്തകള്‍

ബ്രിട്ടനില്‍ 2024-ല്‍ ഭവനവില 4% താഴുമെന്ന പ്രവചനം ഉപേക്ഷിച്ച് 3% വര്‍ദ്ധിക്കുമെന്ന് തിരുത്തി എസ്റ്റേറ്റ് ഏജന്റ്. 2024 അവസാനത്തോടെ 4 ശതമാനം വില താഴുമെന്ന് മുന്‍പ് പ്രവചിച്ച എസ്റ്റേറ്റ് ഏജന്റ് നൈറ്റ് ഫ്രാങ്കാണ് ഈ നിലപാട് തിരുത്തിയത്. കുറയുന്ന പണപ്പെരുപ്പത്തിന്റെ പിന്തുണയിലാണ് ഭവനവിപണിയില്‍ പോസ്റ്റീവ് മനോഭാവം വളരുന്നത്.

മൂന്ന് മാസം മുന്‍പ് 2023 ഒക്ടോബറിലാണ് വില താഴുമെന്ന പ്രവചനം നടത്തിയത്. എന്നാല്‍ മോര്‍ട്ട്‌ഗേജ് നിരക്കുകളില്‍ ഇത് ശേഷമുണ്ടായ താഴ്ചയാണ് തങ്ങളുടെ നിലപാടില്‍ മാറ്റം വരുത്തുന്നതെന്ന് ഏജന്‍സി പറഞ്ഞു. ഈ വര്‍ഷം ബാങ്ക് ഓഫ് ഇംഗ്ലണ്ടിന്റെ ബേസ് റേറ്റ് മാറ്റങ്ങള്‍ ഏത് വിധത്തിലായിരിക്കുമെന്ന വിപണിയുടെ പ്രതീക്ഷകളും ഇതിന് സംഭാവന നല്‍കുന്ന ഘടകമാണ്.

2028-ഓടെ ബ്രിട്ടനിലെ ഭവനവിലയില്‍ 20% വര്‍ദ്ധനവ് സംഭവിക്കുമെന്നാണ് നൈറ്റ് ഫ്രാങ്ക് ഇപ്പോള്‍ പ്രവചിക്കുന്നത്. 'ഒക്ടോബറില്‍ സാമ്പത്തിക വിപണികള്‍ പ്രതീക്ഷിച്ചത് 2024-ല്‍ ഒരൊറ്റ തവണ 0.25 ശതമാനം പലിശ നിരക്ക് കുറയുമെന്നാണ്. എന്നാല്‍ കഴിഞ്ഞ ആഴ്ചയോടെ ഇതിന്റെ എണ്ണം അഞ്ചായി ഉയര്‍ന്നു. പ്രതീക്ഷിച്ചതിലും വേഗത്തില്‍ പണപ്പെരുപ്പം താഴുന്നതാണ് പ്രധാന കാരണം. ഇതോടെ മോര്‍ട്ട്‌ഗേജ് ലെന്‍ഡര്‍മാരും കഴിഞ്ഞ ആഴ്ചകളില്‍ നിരക്കുകള്‍ കുറച്ചിരുന്നു', അവര്‍ വ്യക്തമാക്കി.


വില്‍പ്പന കുറഞ്ഞ വിപണിയില്‍ ബിസിനസ്സ് പിടിക്കാനാണ് ശ്രമം നടക്കുന്നത്. അഞ്ച് വര്‍ഷത്തെ ഫിക്‌സഡ് റേറ്റ് മോര്‍ട്ട്‌ഗേജ് ഇപ്പോള്‍ 4 ശതമാനത്തില്‍ താഴെ ലഭ്യമാണ്. ഈ പോസ്റ്റീവ് അന്തരീക്ഷത്തിലാണ് യുകെ ഭവനവിലയെ കുറിച്ച് മൂന്ന് മാസം മുന്‍പ് നല്‍കിയ പ്രവചനം തിരുത്തുന്നത്, നൈറ്റ് ഫ്രാങ്ക് വ്യക്തമാക്കി. ജനുവരി 1 മുതല്‍ 44 ലെന്‍ഡര്‍മാര്‍ തങ്ങളുടെ ഉത്പന്നങ്ങളുടെ നിരക്കുകള്‍ കുറച്ചിരുന്നു.