മാവേലിക്കര: യുകെയില് ജോലി വാഗ്ദാനം ചെയ്തു സംസ്ഥാനത്തിന്റെ വിവിധ ഭാഗങ്ങളില് നിന്നു ലക്ഷങ്ങള് തട്ടിയെടുത്ത യുവാവ് അറസ്റ്റില്. കോട്ടയം ഗാന്ധിനഗര് അതിരമ്പുഴ പൈങ്കില് വീട്ടില് ബെയ്സില് ലിജുവിനെ (24) ആണു എസ്എച്ച്ഒ സി.ശ്രീജിത്തിന്റെ നേതൃത്വത്തില് അറസ്റ്റ് ചെയ്തത്.
മാവേലിക്കര തഴക്കര പൂവാത്തറയില് മിഥുന് മുരളി നല്കിയ പരാതിയിലുള്ള അന്വേഷണത്തിലാണു പ്രതിയെ പൊലീസ് പിടികൂടിയത്. മാവേലിക്കര മേഖലയില് നിന്നു 8 പേരില് നിന്നു അഞ്ചര ലക്ഷം രൂപ കബളിപ്പിച്ചതായി മിഥുന്റെ പരാതിയിലുണ്ട്. 2022 സെപ്റ്റംബറില് ആണ് മിഥുന് ഉള്പ്പെടെയുള്ളവരുടെ പക്കല് നിന്നു തുക വാങ്ങിയത്.
കുണ്ടറ പൊലീസ് സ്റ്റേഷനിലും പ്രതിക്കെതിരെ കേസ് നിലവിലുണ്ട്. സംസ്ഥാനത്തിന്റെ വിവിധ ഭാഗങ്ങളില് നിന്നായി 15 ലക്ഷത്തോളം രൂപ തട്ടിയെടുത്തതായാണു പ്രാഥമിക നിഗമനം. സമൂഹമാധ്യമങ്ങളില് പരസ്യം നല്കിയാണു പ്രതി വിദേശജോലി ആഗ്രഹിക്കുന്നവരെ കുടുക്കുന്നത്.
യുകെയില് ജോലി വാഗ്ദാനം ചെയ്തു പണം നല്കാന് തയാറാകുന്നവരെ തിരുവനന്തപുരത്തെ സ്വകാര്യ ആശുപത്രിയില് കൊണ്ടുപോയി മെഡിക്കല് പരിശോധന നടത്തും. പണം വാങ്ങിയ ശേഷം വീസ ഓണ്ലൈനായി മൊബൈല് ഫോണില് എത്തുമെന്നു പറഞ്ഞു വിമാന ടിക്കറ്റിന്റെ പകര്പ്പ് നല്കും. വീസ ലഭിക്കാത്തവര് വിളിക്കുമ്പോള് കള്ളം പറഞ്ഞ് ഒഴിഞ്ഞുമാറുകയാണ് പതിവ് .
