നാണക്കേടായി സര്ക്കാര് ആശുപത്രിയിലെ പ്രീ വെഡ്ഡിങ് ഷൂട്ട്. കര്ണാടകയിലെ ചിത്രദുര്ഗ ജില്ലയിലെ സര്ക്കാര് ആശുപത്രിയിലാണ് സംഭവം. വീഡിയോ ഷൂട്ടിന്റെ ദൃശ്യങ്ങള് സോഷ്യല്മീഡിയയില് വൈറലായതിനെ തുടര്ന്നാണ് നടപടി.
ഭരമസാഗര് ഏരിയയിലെ ജില്ലാ ആശുപത്രിയില് കരാര് അടിസ്ഥാനത്തില് ജോലി ചെയ്യുന്ന അഭിഷേക് എന്ന ഡോക്ടറുടെ ഫോട്ടോ ഷൂട്ടാണ് വിവാദമായത്. മെഡിക്കല് നടപടികളുമായി ബന്ധപ്പെടുത്തിയായിരുന്നു വീഡിയോ ചിത്രീകരിച്ചത്.
ചിത്രദുര്ഗയിലെ ഭരമസാഗര് സര്ക്കാര് ആശുപത്രിയിലെ ഓപ്പറേഷന് തിയറ്ററില് പ്രീ വെഡ്ഡിങ് ഷൂട്ട് നടത്തിയ ഡോക്ടറെ സര്വീസില് നിന്ന് പിരിച്ചുവിട്ടു, കര്ണാടക ആരോഗ്യമന്ത്രി ദിനേശ് ഗുണ്ടു റാവു എക്സില് കുറിച്ചു.
ഡോക്ടര് ശസ്ത്രക്രിയ നടത്തുന്നതും പ്രതിശ്രുത വധു ഡോക്ടറെ സഹായിക്കുന്നതുമാണ് വീഡിയോയിലുള്ളത് വീഡിയോയുടെ അവസാനം രോഗിയായി അഭിനയിച്ചയാള് ശസ്ത്രക്രിയയ്ക്ക് ശേഷം സുഖമായിരിക്കുന്നതായും ചിത്രീകരിച്ചിരിക്കുന്നു. പൂര്ണമായ ലൈറ്റിംഗ് സജ്ജീകരണത്തോടെയായിരുന്നു ഷൂട്ടിംഗ്. ക്യാമറാമാന്മാരും മറ്റുള്ളവരും വീഡിയോ ചിത്രീകരിക്കുമ്പോള് ചിരിക്കുന്നതും കേള്ക്കാം. ഇതിന്റെ ചിത്രങ്ങള് സോഷ്യല്മീഡിയയില് വൈറലായതിനെ തുടര്ന്ന് വലിയ വിമര്ശനം ഉയര്ന്നിരുന്നു.
