കൊച്ചി: 130 കോടി രൂപയുടെ വായ്പ വാഗ്ദാനം ചെയ്ത് മലയാളത്തിലെ പ്രമുഖ നടിയുടെ കൈയില് നിന്നു 37 ലക്ഷം രൂപ തട്ടിയെടുത്ത കൊല്ക്കത്ത സ്വദേശിയെ കൊച്ചി പൊലീസ് സാഹസികമായി പിടികൂടി. അമ്പത്തൊന്നുകാരനായ യാസര് ഇഖ്ബാലിനെയാണ് സാഹസികമായി കൊല്ക്കത്തയില് നിന്ന് പിടികൂടിയത്. കൊച്ചി സിറ്റി സൈബര് സെല്ലിന്റെ സഹായത്തോടെ പാലാരിവട്ടം പൊലീസിലെ പ്രത്യേകാന്വേഷണ സംഘം തട്ടിപ്പു സംഘത്തിലെ മറ്റൊരാളെ കൂടി പിടികൂടാനുള്ള ശ്രമത്തിലാണ്.
വായ്പ തരപ്പെടുത്തിക്കൊടുക്കാമെന്ന് വിശ്വസിപ്പിച്ചാണ് പ്രതി നടിയുമായി സൗഹൃദം സ്ഥാപിച്ചതെന്ന് പൊലീസ് പറയുന്നു. തുടര്ന്ന് 130 കോടി രൂപ വായ്പ ലഭിക്കുന്നതിനായി നടി തട്ടിപ്പു സംഘത്തിന് 37 ലക്ഷം രൂപ കൈമാറി. കൊച്ചിയിലെ പ്രമുഖ ഹോട്ടലില് വച്ചായിരുന്നു ഇടപാട്. പണം കൈമാറിയിട്ടും വായ്പ ലഭ്യമാകാതെ വന്നതോടെ നടി പൊലീസിനെ സമീപിക്കുകയായിരുന്നു. തുടര്ന്ന് നടത്തിയ അന്വേഷണത്തില് പ്രതികളെക്കുറിച്ച് മനസ്സിലാക്കിയ പാലാരിവട്ടം പൊലീസ് കൊല്ക്കത്തയ്ക്ക് യാത്ര തിരിച്ചു. തുടര്ന്ന് നഗരത്തിലെ ടാഗ്രാ പൊലീസ് സ്റ്റേഷന് പരിധിയിലുള്ള ഫ്ലാറ്റില് ഒളിവില് കഴിയുകയായിരുന്ന പ്രതിയെ പിടികൂടുകയായിരുന്നു.
കൊച്ചി സിറ്റി പൊലീസ് കമ്മിഷണര് എസ്.ശ്യാം സുന്ദര് ഐപിഎസ്, ഡിഎസ്പി കെ.എസ്.സുദര്ശന് ഐപിഎസ് എന്നിവരുടെ നിര്ദേശപ്രകാരം എറണാകുളം അസി. കമ്മിഷണര് രാജകുമാറിന്റെ മേല്നോട്ടത്തില് പാലാരിവട്ടം ഇന്സ്പെക്ടര് റിച്ചാര്ഡ് വര്ഗീസിന്റെ നേതൃത്വത്തിലുള്ള സബ് ഇന്സ്പെക്ടര്മാരായ ആല്ബി എസ്.പുത്തുക്കാട്ടില്, അജിനാഥ പിള്ള, സീനിയര് സിപിഒമാരായ അനീഷ്, പ്രശാന്ത്, ജിതിന് ബാലകൃഷ്ണന് എന്നിവരടങ്ങിയ പ്രത്യേക ദൗത്യസംഘമാണ് പ്രതിയെ പിടികൂടിയത്.
