ജനസംഖ്യാ വിസ്ഫോടനത്തിന് സമായനമായ രീതിയില് ലണ്ടനിലേക്കുള്ള കുടിയേറ്റം വലിയ തോതില് വര്ധിച്ചു വരുന്നതായി റിപ്പോര്ട്ടുകള്. ഏതൊരു കാലത്തും ഉണ്ടായിരുന്നതിനേക്കാള് വലുതാണ് ഇപ്പോള് ലണ്ടന് നഗരത്തിലെ ജനസംഖ്യ എന്ന് അടുത്തിടെ നടത്തിയ ഒരു പഠന റിപ്പോര്ട്ട് വെളിപ്പെടുത്തിയിരുന്നു.
കോവിഡ് കാലത്ത് നഗരം വിട്ടുപോയവര് തിരികെ എത്താന് ആരംഭിച്ചതോടെ ലണ്ടനിലെ ജനസംഖ്യ എക്കാലത്തെയും ഉയര്ന്ന നിലയില് എത്തിയിരിക്കുകയാണെന്ന് സെന്റ ഫോര് സിറ്റീസ് നടത്തിയ പഠനം വെളിപ്പെടുത്തുന്നു.
കുറ്റകൃത്യങ്ങള് പെരുകുന്നു, നികുതികള് വര്ദ്ധിക്കുന്നു, സാധാരണക്കാരന് താങ്ങാന് കഴിയുന്ന ഹൗസിംഗ് സൗകര്യങ്ങള് ലഭ്യമല്ലാതായിരിക്കുന്നു എന്നിങ്ങനെയാണ് ഇപ്പോള് നഗരത്തിന്റെ അവസ്ഥ .
2019 പകുതിക്കും 2021 പകുതിക്കും ഇടയിലായി ലണ്ടനിലെ ജനസംഖ്യയില് 75,500 പേരുടെ കുറവുണ്ടായിരുന്നു. എന്നാല്, തൊട്ടടുത്ത വര്ഷം ജനസംഖ്യയില് 66,000 പേരുടെ വര്ദ്ധനവ് ഉണ്ടായതായും റിപ്പോര്ട്ടില് പറയുന്നു. പിന്നീട് ജനങ്ങളുടെ കുത്തൊഴുക്കായിരുന്നു. 2022 ജൂണിലെ കണക്കനുസരിച്ച്, പ്രാഥമിക നഗര മേഖലയില് മാത്രം 10.1 ദശലക്ഷം പേരാണ് താമസിക്കുന്നത്.
ലണ്ടനിലെ കാംഡന്, ടവര് ഹാംലറ്റ് പോലുള്ള ഇന്നര് ബറോകളില്, കോവിഡ് പൂര്വ്വകാലഘട്ടത്തില് ഉണ്ടായിരുന്ന ശരാശരിയേക്കാള് കൂടുതലായി ആളുകള് വരാന് തുടങ്ങിയിട്ടുണ്ട്. ഇത് താമസസൗകര്യങ്ങളുടെ ആവശ്യകത വര്ദ്ധിപ്പിക്കുകയും തത്ഫലമായി വീട് വാടകയില് കുത്തനെ വര്ദ്ധനവ് ഉണ്ടാവുകയും ചെയ്തു.
