എന്എച്ച്എസ് പ്രൊഫഷന് ഉപേക്ഷിച്ച് ഡെന്റിസ്റ്റുകള് സ്വകാര്യ മേഖലയിലേക്ക് ചേക്കേറുന്നത് തടയാന് 25% കൂടുതല് പണം നല്കണമെന്ന് ബ്രിട്ടീഷ് ഡെന്റല് അസോസിയേഷന്. ഡെന്റല് പ്രാക്ടീസുകള്ക്ക് 25% തുക വര്ദ്ധിപ്പിച്ച് നല്കിയാല് ഡെന്റിസ്റ്റുകളെ എന്എച്ച്എസില് പിടിച്ചുനിര്ത്താന് സഹായിക്കുകയും, കൂടുതല് രോഗികളെ കാണാനും കഴിയുമെന്നാണ് നേതാക്കളുടെ നിലപാട്.
ഇംഗ്ലണ്ടിലെ ആക്ടിവിറ്റി റേറ്റ് 28 പൗണ്ടില് നിന്നും 35 പൗണ്ടിലേക്ക് വര്ദ്ധിപ്പിച്ചാല് ഡെന്റിസ്റ്റുകള് സ്വകാര്യ മേഖലയിലേക്ക് ഒഴുകുന്നത് താല്ക്കാലികമായി തടയാന് സാധിക്കുമെന്നു ബ്രിട്ടീഷ് ഡെന്റല് അസോസിയേഷന് പറഞ്ഞു. ഫെബ്രുവരിയില് ഗവണ്മെന്റ് പ്രഖ്യാപിച്ച പദ്ധതികള് പര്യാപ്തമല്ലെന്നും ബിഡിഎ മുന്നറിയിപ്പ് നല്കി. അതേസമയം പരിഷ്കാരങ്ങളെ ന്യായീകരിച്ച മന്ത്രിമാര് ഡെന്റല് കോണ്ട്രാക്ടിന്റെ വിശാലമായ പരിഷ്കാരമാണ് ഉദ്ദേശിക്കുന്നതെന്ന് വിശദീകരിച്ചു.
പുതിയ രോഗികളെ പരിശോധിക്കുന്നതിന് പ്രീമിയം റേറ്റ് നല്കാനും, കനത്ത ക്ഷാമം നേരിടുന്ന മേഖലകളില് ജോലി ചെയ്യാന് തയ്യാറാകുന്ന ഡെന്റിസ്റ്റുകള്ക്ക് 20,000 പൗണ്ട് ഗോള്ഡന് ഹല്ലോ എന്ന നിലയില് നല്കാനുമാണ് ഗവണ്മെന്റ് പദ്ധതി. 2022-ല് ബിബിസി നല്കിയ അന്വേഷണത്തിലാണ് യുകെയിലെ 10 എന്എച്ച്എസ് ഡെന്റല് പ്രാക്ടീസുകളില് 9 ഇടത്തും പുതിയ മുതിര്ന്ന രോഗികളെ ചികിത്സയ്ക്കായി സ്വീകരിക്കുന്നില്ലെന്ന് കണ്ടെത്തിയത്.
എന്എച്ച്എസ് അപ്പോയിന്റ്മെന്റുകളുടെ ലഭ്യത കുറഞ്ഞതോടെ ആളുകള് നൂറുകണക്കിന് മൈല് സഞ്ചരിച്ച് ചികിത്സ കണ്ടെത്താന് നിര്ബന്ധിതരാകുന്നുണ്ട്. ഇതിന് പുറമെ സ്വന്തം നിലയില് പല്ല് പറിക്കാനും, മറ്റ് ചികിത്സകള് നടത്താനും ആളുകള് നിര്ബന്ധിതരായി.
