തിരുവനന്തപുരം: തിരുവനന്തപുരം മെഡിക്കല് കോളജിലെ യുവ വനിതാ ഡോക്ടറെ ഫ്ലാറ്റില് മരിച്ച നിലയില് കണ്ടെത്തി. തിരുവനന്തപുരം മെഡിക്കല് കോളജിലെ സീനിയര് റസിഡന്റ് ഡോക്ടര് വെള്ളനാട് സ്വദേശിനി അഭിരാമി ബാലകൃഷ്ണന് (30) ആണു മരിച്ചത്. അമിത അളവില് അനസ്തേഷ്യ മരുന്ന് കുത്തിവച്ചതാണ് മരണകാരണമെന്ന് പൊലീസ് പറഞ്ഞു.
ഉള്ളൂര് പി.ടി.ചാക്കോ നഗറിലെ ഫ്ലാറ്റില് മെഡിക്കല് കോളജിലെ മറ്റു ഡോക്ടര്മാക്കൊപ്പമാണ് അഭിരാമി വാടകയ്ക്കു താമസിച്ചിരുന്നത്. ചൊവ്വാഴ്ച ഉച്ചയ്ക്കു ഭക്ഷണത്തിനുശേഷം മുറിയില് കയറി വാതിലടിച്ച അഭിരാമിയെ ഏറെനേരം വിളിച്ചിട്ടും തുറക്കാത്തതിനെ തുടര്ന്നു നടത്തിയ പരിശോധനയില് അബോധാവസ്ഥയില് കണ്ടെത്തുകയായിരുന്നു. ഉടന് മെഡിക്കല് കോളജ് ആശുപത്രിയില് പ്രവേശിപ്പിച്ചെങ്കിലും മരിച്ചിരുന്നു. മുറിയില് നിന്നു സിറിഞ്ചും ആത്മഹത്യാക്കുറിപ്പും കണ്ടെടുത്തു.
കൊല്ലം സ്വദേശിയായ ഡോ.പ്രതീഷ് രഘുവാണ് അഭിരാമിയുടെ ഭര്ത്താവ്. നാല് മാസം മുന്പായിരുന്നു ഇവരുടെ വിവാഹം. അസ്വാഭാവിക മരണത്തിനു പൊലീസ് കേസെടുത്തു. മൃതദേഹം മെഡിക്കല് കോളജ് മോര്ച്ചറിയില്.
നാല് മാസം മുമ്പ് ആയിരുന്നു സുഹൃത്ത് വിവാഹത്തിന് സ്ത്രീധനം ആവശ്യപ്പെട്ടതിന്റെ മനോവിഷമത്തില് 26 വയസ്സുകാരിയായ തിരുവനന്തപുരം മെഡിക്കല് കോളേജിലെ ബിരുദാനന്തര വിദ്യാര്ത്ഥിനി ഷഹാന ആത്മഹത്യ ചെയ്തത്.
