കോട്ടയം : സിസ്റ്റര് ജോസ്മരിയ കൊലപാതകക്കേസില് പ്രതി സതീഷ് ബാബുവിനെ വെറുതെവിട്ട് കോടതി. തെളിവില്ലെന്നു ചൂണ്ടിക്കാട്ടിയാണു സതീഷ് ബാബുവിനെ കോട്ടയം അഡീഷനല് ഡിസ്ട്രിക്ട് ആന്ഡ് സെഷന്സ് കോടതി വെറുതെ വിട്ടത്. മറ്റൊരു കന്യാസ്ത്രീയെ കൊലപ്പെടുത്തിയ കേസില് ജീവപരന്ത്യം ശിക്ഷിക്കപ്പെട്ടു തിരുവനന്തപുരം സെന്ട്രല് ജയിലിലാണു ഇയാള് ഇപ്പോഴുളളത്.
മൈലാടി എസ് എച്ച് കോണ്വെന്റിലെ എഴുപത്തിയഞ്ചുകാരി സിസ്റ്റര് ജോസ് മരിയയെ പ്രതി മോഷണ ശ്രമത്തിനിടെ തലയ്ക്കടിച്ച് കൊലപ്പെടുത്തിയെന്നായിരുന്നു കേസ്. 2015 ഏപ്രില് 17 നായിരുന്നു സംഭവം. പ്രതി കാസര്ഗോഡ് സ്വദേശി സതീശ് ബാബുവാണ് കൃത്യം നടത്തിയതെന്ന് തെളിയിക്കാന് പ്രോസിക്യൂഷന് കഴിഞ്ഞില്ലെന്ന് ചൂണ്ടിക്കാട്ടിയാണ് കോട്ടയം അഡീഷണല് സെഷന്സ് കോടതി ജഡ്ജി എല്സമ്മ ജോസഫ് പ്രതിയെ വെറുതെ വിട്ടത്. റീ പോസ്റ്റുമോര്ട്ടത്തിനായി പുറത്തെടുത്ത മൃതദേഹം സിസ്റ്റര് ജോസ് മരിയയുടെതാണെന്ന് തെളിയിക്കാനും സാധിച്ചില്ല. പ്രതി ഉപയോഗിച്ചെന്ന് പറയുന്ന കമ്പി വടിയും അന്വേഷണ സംഘത്തിന് കണ്ടെത്താന് കഴിഞ്ഞില്ല. ഇക്കാര്യങ്ങള് ചൂണ്ടിക്കാട്ടിയാണ് കോടതി നടപടി.
പാലായിലെ സിസ്റ്റര് അമല കൊലക്കേസില് നിലവില് തിരുവന്തപുരം സെന്റര് ജയില് തടവില് കഴിയുകയാണ് പ്രതി സതീശ് ബാബു. മോഷണ ശ്രമത്തിനിടെയായിരുന്നു സിസ്റ്റര് അമലയെ കൊല്ലപ്പെടുത്തിയത്. ഈ കേസിന്റെ വിചാരണ വേളയിലാണ് സിസ്റ്റര് ജോസ് മരിയയെ കൊലപ്പെടുത്തിയ കാര്യം പ്രതി വെളിപ്പെടുത്തിയത്. വിധിക്കെതിരെ അപ്പീല് നല്കുമെന്ന് പ്രോസിക്യൂഷന് അറിയിച്ചു.
