കഴിഞ്ഞ ദിവസം കാഞ്ഞാണിയില് നിന്നും കാണാതായ അമ്മയുടെയും കുഞ്ഞിന്റെയും മൃതദേഹം പുഴയില് നിന്നും കണ്ടെത്തി. പാലാഴിയില് കാക്കമാട് പ്രദേശത്തെ പുഴയില് നിന്നാണ് മൃതദേഹം കണ്ടെത്തിയത്. മണലൂര് ആനക്കാട് സ്വദേശിനി കുന്നത്തുള്ളി വീട്ടില് കൃഷ്ണപ്രിയ (24), മകള് പൂജിത (ഒന്നര) എന്നിവരെയാണ് മരിച്ച നിലയില് കണ്ടെത്തിയത്. ഇവരുടെ ഐ.ഡി. കാര്ഡ് പോലീസിനു ലഭിച്ചു.
തിങ്കളാഴ്ച ഉച്ചക്ക് 2 മണിയോടെയാണ് ഭര്ത്താവിന്റെ വീട്ടിലേക്ക് പുറപ്പെട്ട യുവതിയേയും ഒന്നര വയസ്സുകാരിയായ മകളെയും കാണാതായത്. ഇത് സംബന്ധിച്ച് യുവതിയുടെ ഭര്ത്താവ് അന്തിക്കാട് കല്ലിടവഴി സ്വദേശി അഖില് പോലീസില് പരാതി നല്കിയിരുന്നു.
കാഞ്ഞാണിയില് മെഡിക്കല് ഷോപ്പിലെ ജീവനക്കാരിയായ യുവതി ഉച്ചയ്ക്ക് കുഞ്ഞിനേയും കൊണ്ട് ഭര്ത്താവിന്റെ വീട്ടിലേക്ക് പോവുകയാണെന്ന് പറഞ്ഞാണ് കാത്താണിയിലെ സ്വന്തം വീട്ടില് നിന്നും ഇറങ്ങിയത്. രാത്രിയായിട്ടും ഇവരെ കാണാതെ വന്നതോടെ ഭര്ത്താവ് അന്തിക്കാട് പോലീസില് പരാതി നല്കുകയായിരുന്നു.
തുടര്ന്ന് ഇന്ന് പുലര്ച്ചയോടെ നടക്കാനിറങ്ങിയവരാണ് അമ്മയുടെയും കുഞ്ഞിന്റെയും മൃതദേഹം കണ്ടെത്തിയത്. പുഴയില് കമിഴ്ന്ന നിലയിലാണ് മൃതദേഹം കണ്ടത്. ഇതിന് സമീപത്തു നിന്ന് ലഭിച്ച ബാഗില് നിന്ന് യുവതിയുടെ ഐഡി കാര്ഡ് ലഭിച്ചു. അന്തിക്കാട് എസ് ഐ പ്രവീണിന്റെ നേതൃത്വത്തില് പോലീസ് സ്ഥലത്തെത്തി മേല്നടപടികള് സ്വീകരിച്ചു.
