മെഗാഹിറ്റായ 'മഞ്ഞുമ്മല് ബോയ്സ്' സിനിമയുടെ നിര്മ്മാതാക്കള്ക്കെതിരെ ഇളയരാജയുടെ വക്കീല് നോട്ടീസ്. സിനിമയില് 'കണ്മണി അന്പോട്' എന്ന തന്റെ പഴയ ഗാനം ഉപയോഗിച്ചതിനാണ് നോട്ടീസ്. പകര്പ്പവകാശ നിയമം ലംഘിച്ചുവെന്നും 15 ദിവസത്തിനകം നഷ്ടപരിഹാരം നല്കണമെന്നുമാണ് ആവശ്യം. തന്റെ അനുമതി തേടിയില്ലെങ്കില് നിയമനടപടിയുമായി മുന്നോട്ട് പോകുമെന്നും ഇളയരാജ നോട്ടീസില് പറയുന്നു. സൗബിന് ഷാഹിര്, ബാബു ഷാഹിര്, ഷോണ് ആന്റണി എന്നിവരുടെ ഉടമസ്ഥതിയിലുള്ള പറവ ഫിലിംസാണ് മഞ്ഞുമ്മല് ബോയ്സിന്റെ നിര്മ്മാതാക്കള്.
1991ല് സന്താന ഭാരതി സംവിധാനം ചെയ്ത് കമല് ഹാസന് ടൈറ്റില് റോളിലെത്തിയ 'ഗുണ' എന്ന ചിത്രത്തിന് വേണ്ടി ഇളയരാജ ചിട്ടപ്പെടുത്തിയ ഗാനമാണ് 'കണ്മണി അന്പോട് കാതലന് നാന്' എന്ന് തുടങ്ങുന്ന ഗാനം.
ചിദംബരം സംവിധാനം ചെയ്ത 'മഞ്ഞുമ്മല് ബോയ്സ്' എന്ന ചിത്രത്തില് ഈ ഗാനവും കമല്ഹാസന്റെ സംഭാഷണങ്ങളും ഉപയോഗിച്ചിട്ടുണ്ട്. സിനിമ പുറത്തിറങ്ങി രണ്ടുമാസം ആകുമ്പോഴാണ് ഇളയരാജയുടെ വക്കീല് നോട്ടീസ്.
