ടെലിവിഷനിലൂടെ എത്തി, സിനിമയില് അരങ്ങേറി ശ്രദ്ധേയ ആയ നടിയാണ് രചന നാരായണന്കുട്ടി. ലിജോ ജോസ് പെല്ലിശ്ശേരി സംവിധാനം ചെയ്ത 'ആമേന്'എന്ന ചിത്രത്തില് ഒരു മികച്ച വേഷത്തിലൂടെ സിനിമയില് സജീവമാവാന് തുടങ്ങിയ രചന മികച്ച നര്ത്തകി കൂടിയാണ്. ബി. ഉണ്ണികൃഷ്ണന് സംവിധാനം ചെയ്ത ‘ആറാട്ട്’ എന്ന ചിത്രത്തിലും രചന ശ്രദ്ധേയമായ ഒരു വേഷം ചെയ്തിരുന്നു.
ഇപ്പോഴിതാ സിനിമയിലെ തന്റെ കഥാപാത്രത്തെ കുറിച്ചും വിവാഹമോചനത്തെ കുറിച്ചും സംസാരിക്കുകയാണ് രചന. വെറും പത്തൊന്പത് ദിവസങ്ങള് മാത്രമാണ് വിവാഹജീവിതം നീണ്ടുനിന്നതെന്നും ശാരീരികമായും മാനസികമായും മുന് ഭര്ത്താവ് പീഡിപ്പിച്ചിരുന്നെന്നും രചന പറയുന്നു.
'ഞാന് സെപറേറ്റഡ് ആയ വ്യക്തിയാണ്. അത് കഴിഞ്ഞിട്ട് പത്ത് വര്ഷമായി. അതിന് ശേഷമാണ് ഞാന് അഭിനയിക്കാന് വന്നതും. പത്ത് വര്ഷം കഴിഞ്ഞിട്ടും വെറും പത്തൊന്പത് ദിവസത്തിനുള്ളില് രചനയുടെ വിവാഹം മുടങ്ങി, പിരിഞ്ഞു എന്നൊക്കെ ഇപ്പോഴും സോഷ്യല് മീഡിയയില് വരും. നമ്മള് അതൊക്കെ കഴിഞ്ഞ് ഒരുപാട് കടമ്പകള് കടന്ന് മുന്നോട്ട് വന്ന് പുതിയൊരു വേ ഓഫ് ലൈഫ് നോക്കുകയാണ്.
പത്തൊന്പത് ദിവസങ്ങള് മാത്രമാണ് ഞങ്ങള് ഭാര്യാ ഭര്ത്താക്കന്മാരായി കഴിഞ്ഞത്. 2012 ല് തന്നെ വിവാഹമോചനം നേടി. ശാരീരികവും മാനസികവുമായി പീഡിപ്പിക്കുന്നു എന്ന തന്റെ വാദം കോടതി അംഗീകരിക്കുകയായിരുന്നു. പിന്നീടാണ് അഭിനയ രംഗത്തേക്ക് കടന്ന് വന്നത്.
അതൊക്കെ കഴിഞ്ഞു. ഇപ്പോള് ഒരു കുഴപ്പവുമില്ല. ഇപ്പോഴെനിക്ക് ഡിപ്രഷന് എന്ന വാക്ക് തന്നെ അറിയില്ല. ആരാധകരായ ഒരുപാട് പേര് വിളക്കാറുണ്ട്. അവരോട് സംസാരിക്കാന് സമയം കണ്ടെത്താറുണ്ട്. ആറാട്ട് കഴിഞ്ഞതിന് ശേഷം ഒരുപാട് പേരുടെ സ്നേഹം കൂടുതല് കിട്ടാന് തുടങ്ങി-രചന പറയുന്നു.
