ദേശീയ പാര്ട്ടി പദവി സിപിഎം നിലനിര്ത്തിയത് രാഹുല് ഗാന്ധി കാരണമെന്ന് മാത്യു കുഴല്നാടന് എംഎല്എ. രാജസ്ഥാനില് സിപിഎമ്മിന് വേണ്ടി രാഹുല് വോട്ട് പിടിച്ചത് കൊണ്ടാണ് ഈനാംപേച്ചിയും മരപ്പട്ടിയും ചിഹ്നമാകാതെ രക്ഷപ്പെട്ടതെന്നും നിയമസഭയില് കുഴല്നാടന് പറഞ്ഞു. രാജസ്ഥാനില് സിപിഎം സ്ഥാനാര്ത്ഥിയെ ജയിപ്പിക്കാന് പിണറായി യാത്ര നടത്തിയോ എന്നും കോണ്ഗ്രസ് നേതാക്കളാണ് അവിടെ വോട്ട് പിടിച്ചതെന്നും കുഴല്നാടന് ചൂണ്ടിക്കാട്ടി.
രാഹുല് ഗാന്ധിയെ എല്ലാവരും പിന്തുണച്ചപ്പോള് ഒരേയൊരു നേതാവാണ് എതിര്ത്തത്. അത് പിണറായി വിജയനാണെന്ന് കുഴല്നാടന് നിയമസഭയില് പറഞ്ഞു. സിപിഎമ്മിന് ഇന്ത്യയിലുള്ള ഏക മുഖ്യമന്ത്രിയാണ് പിണറായി വിജയന്. രാജസ്ഥാനിലെ സിക്കാറില് സിപിഎം സ്ഥാനാര്ഥി വിജയിപ്പിക്കാന് പിണറായി വിജയന് യാത്ര നടത്തിയോ? താങ്കള് വിദേശത്ത് കുടുംബസമേതം നടക്കുമ്പോള് രാഹുല് ഗാന്ധിയും അശോക് ഗെഹ്ലലോട്ടും സച്ചിന് പൈലറ്റും അരിവാള് ചുറ്റിക നക്ഷത്രത്തിന് വേണ്ടി രാജസ്ഥാനില് വോട്ട് പിടിച്ചത് കൊണ്ടാണ് ഈനാപേച്ചിയും മരപ്പട്ടിയും നിങ്ങളെ തേടിവരാത്തത്. കമ്മ്യൂണിസം മനസിലുള്ള സഖാക്കന്മാരെ നിങ്ങള് രാഹുല് ഗാന്ധിയോടാണ് ഇന്ന് നന്ദി പറയേണ്ടതെന്ന് മാത്യു കുഴല്നാന് പറഞ്ഞു.
ലോക്സഭാ തിരഞ്ഞെടുപ്പില് രാജസ്ഥാനിലെ സിക്കാറില് നിന്നുള്ള സിപിഎം സ്ഥാനാര്ഥിയായ അമ്ര റാം 72896 വോട്ടുകളുടെ ഭൂരിപക്ഷത്തിലാണ് ബിജെപിയുടെ സ്ഥാനാര്ഥിയോട് ജയിച്ചത്. ഇതോടെയാണ് സിപിഎമ്മിന് ദേശീയ പാര്ട്ടി പദവിയില് തല്ക്കാലം ഭീഷണി ഒഴിഞ്ഞത്. നേരത്തെ സിപിഎമ്മിനു ദേശീയ പാര്ട്ടി നഷ്ടപ്പെടുന്ന സ്ഥിതിയുണ്ടായാല് ഈനാംപേച്ചിയും മരപ്പട്ടിയും ഒക്കെയാവും ചിഹ്നമെന്നു എകെ ബാലന് പറഞ്ഞത് വലിയ വാര്ത്തയായിരുന്നു.
