നര്ത്തകന് ആര്എല്വി രാമകൃഷ്ണനെ ജാതീയമായി അധിക്ഷേപിച്ച കേസില് നര്ത്തകി സത്യഭാമ നെടുമങ്ങാട് കോടതിയില് കീഴടങ്ങി. അഡ്വക്കേറ്റ് ആളൂരിനൊപ്പമാണ് സത്യഭാമ കോടതിയില് എത്തിയത്. നേരത്തെ ഹൈക്കോടതി സത്യഭാമയുടെ മുന്കൂര് ജാമ്യാപേക്ഷ തള്ളിയിരുന്നു. ഹൈക്കോടതിയുടെ നിര്ദേശ പ്രകാരമാണ് കീഴടങ്ങല്. നെടുമങ്ങാട് എസ്സി/ എസ്ടി കോടതിയില് സത്യഭാമ മുന്കൂര് ജാമ്യാപേക്ഷ നല്കുകയും ചെയ്തു.
ഒരാഴ്ചക്കുളളില് കേസ് പരിഗണിക്കുന്ന തിരുവനന്തപുരത്തെ കോടതിയില് ഹാജരാകാനാണ് നേരത്തെ ഹൈക്കോടതി നിര്ദേശിച്ചത്. അന്നേദിവസം തന്നെ കീഴ്ക്കോടതി ജാമ്യാപേക്ഷ പരിഗണിച്ച് ഉചിതമായ തീരുമാനം എടുക്കണമെന്നും സിംഗിള് ബെഞ്ച് ഉത്തരവിട്ടിരുന്നു. സത്യഭാമ സമര്പ്പിച്ച മുന്കൂര് ജാമ്യാപേക്ഷ തീര്പ്പാക്കിയാണ് ഹൈക്കോടതി ഈ നിര്ദേശം നല്കിയത്.
അധിക്ഷേപ പരാമര്ശത്തില് കലാമണ്ഡലം സത്യഭാമക്കെതിരെ പൊലീസ് കേസെടുത്തിരുന്നു. നര്ത്തകനും കലാഭവന് മണിയുടെ സഹോദരനുമായ ആര്എല്വി രാമകൃഷ്ന് നല്കിയ പരാതിയിലാണ് തിരുവനന്തപുരം കന്റോണ്മെന്റ് പൊലീസ് കേസ് രജിസ്ര് ചെയ്തത്. എസ്സി എസ്ടി വകുപ്പ് പ്രകാരമാണ് കേസെടുത്തത്. ജാമ്യമില്ലാ വകുപ്പാണ് സത്യഭാമയ്ക്കെതിരെ ചുമത്തിയത്.
ഒരു അഭിമുഖത്തിലാണ് രാമകൃഷ്ണന് കാക്കയുടെ നിറമാണെന്നും നൃത്തം ചെയ്യുന്നത് കണ്ടാല് പെറ്റ തള്ള പൊറുക്കില്ലെന്നും സത്യഭാമ ആക്ഷേപിച്ചത്. മോഹിനിയാകാന് സൗന്ദര്യം വേണം. കറുത്ത കുട്ടികള് മേക്കപ്പിട്ടാണ് മത്സരങ്ങളില് സമ്മാനം വാങ്ങുന്നത്. കറുത്ത നിറമുള്ളവരെ മോഹിനിയാട്ടം പഠിപ്പിക്കുമെന്നും എന്നാല് മത്സരങ്ങളില് പങ്കെടുക്കരുതെന്ന് പറയുമെന്നും സത്യഭാമ ഒരു യുട്യൂബ് ചാനലിന് നല്കിയ അഭിമുഖത്തിലാണ് പറഞ്ഞത്. ഇത് ഏറെ വിവാദമായിരുന്നു.
