കൊരട്ടിയില്നിന്ന് കാണാതായ യുവ ദമ്പതികള് വിഷം കുത്തിവച്ച് വേളാങ്കണ്ണിയില് മരിച്ച നിലയില്
ചാലക്കുടി: കൊരട്ടിയില് നിന്ന് കാണാതായ യുവദമ്പതികളെ വേളാങ്കണി പള്ളിയുടെ ലോഡ്ജില് വിഷം കുത്തിവച്ച് മരിച്ച നിലയില് കണ്ടെത്തി. തിരുമുടിക്കുന്ന് മുടപ്പുഴ അരിമ്പിള്ളി വര്ഗീസിന്റെയും എല്സിയുടേയും മകന് ആന്റോ(34) ഭാര്യ ജിസു (29) എന്നിവരാണ് മരിച്ചത്. വെസ്റ്റ് കൊരട്ടി കിലുക്കന് ജോയിയുടെ മകളാണ് ജിസു.
ഇക്കഴിഞ്ഞ 22–ാം തീയതി ശനിയാഴ്ച വൈകുന്നേരം മുതലാണ് ഇവരെ തിരുമുടിക്കുന്നിലെ വീട്ടില്നിന്ന് കാണാതായത്. വേളാങ്കണ്ണിയില് എത്തിയശേഷം അവിടെ എന്തോ ജോലിയില് പ്രവേശിച്ചതായും പറയപ്പെടുന്നു.
അതിനിടയില് ചൊവ്വാഴ്ച്ച വൈകിട്ട് വിഷം കുത്തിവച്ച് അവശ നിലയില് കാണപ്പെട്ട ആന്റോയെ നാഗപട്ടണം മെഡിക്കല് കോളജ് ആശുപത്രിയില് പ്രവേശിപ്പിച്ചെങ്കിലും രാത്രിയോടെ മരണം സംഭവിക്കുകയായിരുന്നു. ഭര്ത്താവ് മരിച്ചതറിഞ്ഞ ജിസുവും വിഷം കുത്തിവച്ച് ജീവനൊടുക്കിയതായാണ് വിവരം.
രണ്ടു പേരുടേയും മൃതദേഹം പൊലീസ് നടപടികള്ക്കു ശേഷം നാഗപട്ടണം മെഡിക്കല് കോളജില് പോസ്റ്റ്മോര്ട്ടം നടത്തി ബന്ധുക്കള്ക്ക് വിട്ടുകൊടുക്കും. സംസ്കാരം വ്യാഴാഴ്ച തിരുമുടിക്കുന്ന് ചെറുപുഷ്പം ദേവാലയത്തില്.
