തിരുവനന്തപുരം തമ്പാനൂര് റെയില്വേ സ്റ്റേഷന് സമീപത്തെ ആമയിഴഞ്ചാന് തോട്ടില് കാണാതായ ജോയിയുടെ മൃതദേഹം 46 മണിക്കൂറിന് ശേഷം കണ്ടെത്തി. പഴവങ്ങാടി തകരപ്പറമ്പിലെ കനാലിലാണ് മൃതദേഹം കണ്ടെത്തിയത്. റെയില്വേയില് നിന്ന് വെള്ളം ഒഴുകി എത്തുന്നത് ഇവിടെയാണ്.
തുണി മൂടിയ നിലയിലായിരുന്നു മൃതദേഹം കിടന്നിരുന്നതെന്ന് ആദ്യം കണ്ട കോര്പ്പറേഷനിലെ ശുചീകരണ തൊഴിലാളി പറഞ്ഞു. കമിഴ്ന്ന് കിടക്കുകയായിരുന്നു. മുളവടി കൊണ്ട് തുണി നീക്കിയപ്പോഴാണ് മൃതദേഹം കണ്ടത്. ഉടന് തന്നെ ഉദ്യോഗസ്ഥരെ വിവരം അറിയിച്ചു. അവര് മറ്റുള്ളവരെ അറിയിക്കുകയായിരുന്നുവെന്ന് ജോയിയുടെ മൃതദേഹം കണ്ട ശുചീകരണ തൊഴിലാളി പറയുന്നു.
രാവിലെ ഒമ്പതുമണിയോടെയാണ് തകരപ്പറമ്പിലെ ശ്രീചിത്ര പുവര്ഹോമിന് പിന്നിലെ കനാലില് മൃതദേഹം കണ്ടെത്തുന്നത്. റെയില്വേയില് നിന്ന് വെള്ളം ഒഴുകി വരുന്ന ഭാഗമാണിത്. തൊഴിലാളികള് വിവരം അറിയിച്ചതിനെത്തുടര്ന്ന് ഉടന് തന്നെ പൊലീസും ഫയര്ഫോഴ്സും സ്ഥലത്തെത്തുകയും, മൃതദേഹം കനാലില് നിന്നും പുറത്തെടുക്കുകയും ചെയ്തു. തുടര്ന്ന് മൃതദേഹം തിരുവനന്തപുരം മെഡിക്കല് കോളജിലേക്ക് മാറ്റി. ജീര്ണിച്ച നിലയിലായതിനാല് മൃതദേഹം ഡിഎന്എ പരിശോധനയ്ക്ക് വിധേയനാക്കുമെന്നാണ് വിവരം.
