പത്തനംതിട്ട: തിരുവല്ലയില് കാര് കത്തി ദമ്പതികള് മരിച്ച സംഭവം ആത്മഹത്യ. തുകലശ്ശേരി സ്വദേശികളായ രാജു തോമസ്(69), ഭാര്യ ലൈജി തോമസ്(63) എന്നിവരാണ് മരിച്ചത്. ആത്മഹത്യക്ക് കാരണം ഏക മകന് ലഹരിയ്ക്കു അടിമയായതുകൊണ്ടെന്ന കുറിപ്പ് കണ്ടെത്തി.
മകനുമായി രാജു തോമസും ഭാര്യയും തര്ക്കത്തിലായിരുന്നുവെന്നും അതാണ് ആത്മഹത്യയിലേക്ക് നയിച്ചതെന്നുമാണ് പോലീസ് വ്യക്തമാക്കി. മകന്റെ ദാമ്പത്യ ജീവിതത്തിലെ പ്രശ്നങ്ങള്, മദ്യപാന ശീലം, വീട് ജപ്തിയായത് തുടങ്ങിയ പ്രശ്നങ്ങളാണ് ദമ്പതികളെ ആത്മഹത്യ ചെയ്യാന് പ്രേരിപ്പിച്ചതെന്ന് ബന്ധുക്കളും പറയുന്നു. ആളൊഴിഞ്ഞ പ്രദേശത്തേക്ക് ദമ്പതികള് എന്തിനെത്തി എന്നതില് പൊലീസിന് സംശയങ്ങളുണ്ടായിരുന്നു. പിന്നീട് നടത്തിയ പ്രാഥമിക അന്വേഷണത്തിലാണ് ദമ്പതികള് ആത്മഹത്യ ചെയ്തതാവാനാണ് സാധ്യതയെന്ന നിഗമനത്തിലേക്ക് പൊലീസ് എത്തിയത്.
വേങ്ങലില് പാടത്തോട് ചേര്ന്നുള്ള റോഡിലാണ് സംഭവം. ഉച്ചയോടെയായിരുന്നു സംഭവം നാട്ടുകാരുടെ ശ്രദ്ധയില്പെട്ടത്. വിവരമറിഞ്ഞെത്തിയ ഫയര് ഫോഴ്സ് എത്തി തീ വച്ചെങ്കിലും മൃതദേഹങ്ങള് പൂര്ണമായും കത്തിക്കരിഞ്ഞിരുന്നു. അതേസമയം കാറിനുള്ളില് നിന്ന് തന്നെയാണ് തീ പടര്ന്നതെന്നാണ് പൊലീസ് അറിയിച്ചു. കാറിന്റെ നമ്പര് കേന്ദ്രീകരിച്ച് നടത്തിയ അന്വേഷണത്തിലാണ് മരിച്ചത് രാജു തോമസും ഭാര്യ ലൈജിയുമാണെന്ന് തിരിച്ചറിഞ്ഞത്. കത്തിക്കരിഞ്ഞ് തിരിച്ചറിയാനാകാത്ത നിലയിലാണ് മൃതദേഹങ്ങള്.
