വയനാട് ദുരന്തഭൂമിയില് നിന്നും സൈന്യം മടങ്ങി. 500 അംഗ സംഘമാണ് ദുരന്തബാധിത പ്രദേശങ്ങളായ മുണ്ടക്കൈ, ചൂരല്മല എന്നിവിടങ്ങളില് നിന്നും 10 ദിവസത്തെ സേവനത്തിനുശേഷം മടങ്ങിയത്. ദുരന്ത മുഖത്ത് കൈമെയ് മറന്ന് പ്രവര്ത്തിച്ച സൈന്യത്തിന് സര്ക്കാര് യാത്രയയപ്പ് നല്കി. അതേസമയം സൈന്യത്തിന്റെ 2 ടീം മാത്രം ദുരന്ത ഭൂമിയില് തുടരും.
ദുരന്തഭൂമിയില് ജനങ്ങള് നല്കിയ സേവനങ്ങള്ക്ക് സൈന്യം നന്ദി അറിയിച്ചു. രക്ഷാപ്രവര്ത്തനം പൂര്ണമായും എന്ഡിആര്എഫ്, എസ്ഡിആര്എഫ്, ഫയര്ഫോഴ്സ്, പൊലീസ് എന്നീ സേനകള്ക്ക് കൈമാറുമെന്നും സൈന്യം അറിയിച്ചു. അതേസമയം സൈന്യത്തിന്റെ സേവനത്തിന് പൊതുമരാമത്ത് വകുപ്പ് മന്ത്രി പി എ മുഹമ്മദ് റിയാസ് തിരികെ നന്ദിയറിയിച്ചു. ഒത്തൊരുമിച്ച് ഒരു ശരീരം പോലെ പ്രവര്ത്തിച്ചു. ചെയ്യാനാകുന്നതെല്ലാം സൈന്യം ചെയ്തെന്നും മന്ത്രി പറഞ്ഞു.
സൈന്യത്തിന്റെ 500 അംഗ സംഘമാണ് ഇന്ന് മടങ്ങിയത് . തിരുവനന്തപുരം, കോഴിക്കോട്, കണ്ണൂര്, ബെംഗളുരു എന്നിവിടങ്ങളില് നിന്നുള്ള ബറ്റാലിയന് അംഗങ്ങളാണിവര്. അതേസമയം സൈന്യത്തിന്റെ 2 ടീം മാത്രമാണ് ഇനി ദുരന്ത ഭൂമിയില് തുടരുക. ഹെലികോപ്റ്റര് തിരച്ചിലിനും ബെയ്ലി പാലം ശക്തിപ്പെടുത്താനുമുള്ള ടീം മാത്രം വയനാട്ടില് നില്ക്കും. തിരച്ചിലിന് എന്ഡിആര്എഫ്, അഗ്നിശമനസേന തുടങ്ങിയവര് വയനാട്ടില് പ്രവര്ത്തിക്കും.
