ആലപ്പുഴയില് നവജാത ശിശുവിനെ കുഴിച്ചിട്ട സംഭവം; യുവതി കുട്ടിയെ കൈമാറിയത് മരിച്ച ശേഷമെന്ന് പ്രതി
ആലപ്പുഴ: നവജാത ശിശുവിനെ കുഴിച്ചിട്ട സംഭവത്തില് കൂടുതല് വിവരങ്ങള് പുറത്ത്. പ്രസവം നടന്നത് പുലര്ച്ചെ 1.30 ന് എന്നാണു യുവതിയുടെ മൊഴി. പെണ്കുഞ്ഞിനെയാണ് പ്രസവിച്ചത്. പ്രസവ ശേഷം കാമുകനെ പൂച്ചാക്കലിലെ വീട്ടിലേക്ക് വിളിച്ചു വരുത്തി എന്ന് യുവതി പറഞ്ഞു. യുവതി കുട്ടിയെ കൈമാറിയത് മരിച്ച ശേഷമാണെന്നാണ് യുവാവിന്റെ മൊഴി. ഫൊറന്സിക് സയന്സ് കോഴ്സ് കഴിഞ്ഞയാളാണ് യുവതി.
അവിവാഹിതയായതിനാല് നാണക്കേട് ഭയന്നാണ് പ്രസവ വിവരം മറച്ചുവെച്ചതാണെന്നാണ് യുവതിയുടെ മൊഴി. കുഞ്ഞ് ജനിച്ച ഉടന് കരഞ്ഞിരുന്നില്ലെന്നും യുവതി പറയുന്നു.
ദുരൂഹതകള് ഏറെയുള്ള സംഭവത്തില് പൊലീസ് അന്വേഷണം തുടരുകയാണ്. അമ്മയും ആണ്സുഹൃത്തും ചേര്ന്ന് കുഞ്ഞിനെ കൊലപ്പെടുത്തിയതാണോ, അമ്മ കുഞ്ഞിനെ കൊന്ന് കാമുകന് നല്കിയതാണോ തുടങ്ങിയ ചോദ്യങ്ങള്ക്കാണ് ഉത്തരം കണ്ടെത്തേണ്ടത്. യുവതി പൊലീസ് കസ്റ്റഡിയില് ആശുപത്രിയില് ചികിത്സയില് തുടരുകയാണ്. പോസ്റ്റുമോര്ട്ടം റിപ്പോര്ട്ട് പുറത്തു വന്നാല് മാത്രമേ കുഞ്ഞ് കൊല്ലപ്പെട്ടതാണോ എന്ന് സ്ഥിരീകരിക്കാന് കഴിയുകയുള്ളൂ.
കുഞ്ഞിന്റെ പോസ്റ്റുമോര്ട്ടം ഇന്ന് നടക്കും. ആലപ്പുഴ മെഡിക്കല് കോളേജിലാണ് പോസ്റ്റുമോര്ട്ടം നടക്കുക. കേസിലെ രണ്ടാം പ്രതിയായ യുവതിയുടെ ആണ് സുഹൃത്തിനെ പൊലീസ് റിമാന്ഡ് ചെയ്തു.
രാജസ്ഥാനില് പഠിക്കുമ്പോള് ആണ് യുവാവുമായി യുവതി അടുക്കുന്നത്. തിരുവനന്തപുരത്ത് ജോലി ചെയ്യുമ്പോഴും ബന്ധം തുടര്ന്നു. ആശുപത്രി അധികൃതരുടെ പരാതിയിലാണ് യുവതിക്കെതിരായ കേസ് എടുത്തിരിക്കുന്നത്. കുട്ടിയെ ആലപ്പുഴയിലെ അമ്മത്തൊട്ടില് ഉപേക്ഷിച്ചിരുന്നതായി യുവതി മൊഴി നല്കിയിരുന്നു. പൊലീസ് അന്വേഷണത്തിലാണ് യുവതിയുടെ മൊഴി കളവാണെന്ന് കണ്ടെത്തിയത്. ഇതോടെയാണ് കാമുകന് കുട്ടിയെ കൈമാറിയതായി യുവതി മൊഴി നല്കിയത്.
കേസില് നിലവില് തോമസ് ജോസഫ് (24) അശോക് ജോസഫ് (30) എന്നിവരെയാണ് കസ്റ്റഡിയിലെടുത്തത്. ഒന്നാം പ്രതി തോമസ് ജോസഫുമായി തെളിവെടുപ്പ് നടത്തുന്നതിനിടെ കുഞ്ഞിന്റെ മൃതദേഹം കണ്ടെത്തിയിരുന്നു. കൊല്ലനാടി പാടശേഖരത്തിന് സമീപമാണ് മൃതദേഹം കണ്ടെത്തിയത്.
ഈ മാസം എട്ടാം തീയതി യുവതി കൊച്ചിയിലെ സ്വകാര്യ ആശുപത്രിയില് ചികിത്സ തേടി. ഏഴാം തീയതിയാണ് ഇവര് കുഞ്ഞിന് ജന്മം നല്കുന്നത്. പിന്നാലെ രക്തസ്രാവത്തെ തുടര്ന്ന് ആശുപത്രിയില് ചികിത്സയ്ക്കെത്തിയിരുന്നു. ആശുപത്രി അധികൃതര് കുഞ്ഞിനെ തിരക്കിയപ്പോള് അമ്മത്തൊട്ടിലില് ഏല്പിച്ചു എന്നാണ് ഇവര് പറഞ്ഞത്. പിന്നീട് നടത്തിയ വിശദമായ അന്വേഷണത്തിലാണ് കുഞ്ഞിനെ കുഴിച്ചിട്ടതായി വിവരം പുറത്ത് വന്നത്.
