ലണ്ടന്: യുകെയില് താമസിക്കുന്നതിനോ ജോലി ചെയ്യുന്നതിനോ അവകാശമില്ലാത്ത ആളുകളെ ജോലിക്ക് എടുക്കുന്ന തൊഴിലുടമകളെ പൂട്ടാന് ഉറച്ചു ഹോം ഓഫീസ്. യുകെയില് തൊഴിലുടമയെ യോഗ്യത ഇല്ലാത്ത ആളുകളെ ജോലിക്ക് നിയമിച്ചതിന് കുറ്റക്കാരനാണെന്ന് കണ്ടെത്തിയാല് 5 വര്ഷത്തേക്ക് ജയിലിലാക്കാനും വന് തുക പിഴ അടയ്ക്കാനും ശിക്ഷിച്ചേക്കാം.
ജോലി നല്കിയ ആള്ക്ക് യുകെയില് പ്രവേശിക്കാനോ അവിടെ തുടരാനോ അനുമതി ഇല്ലാതിരിക്കുക, ചെയ്യാന് അനുവാദമില്ലാത്ത ജോലികള് ചെയ്യിപ്പിക്കുക, ജോലിക്കെടുക്കുന്നവരുടെ രേഖകള് അപൂര്ണ്ണമായിരിക്കുക തുടങ്ങിയ കാരണങ്ങളാലാണ് യുകയില് ഒരു തൊഴിലുടമ ശിക്ഷിക്കപ്പെടുന്നത്. യുകെയില് അനധികൃതമായി കുടിയേറിയവരെ കണ്ടെത്താനുള്ള ശ്രമത്തിന്റെ ഭാഗമായാണ് ഹോം ഓഫീസ് നിരീക്ഷണം ശക്തമാക്കുന്നത്.
അനധികൃത കുടിയേറ്റം തടയുന്നതിനുള്ള നടപടികളുടെ ഭാഗമായി ആളുകളെ യുകെയിലേക്ക് കടത്തുന്ന സംഘങ്ങളെ ലക്ഷ്യമിട്ട് കൂടുതല് അന്വേഷണ ഉദ്യോഗസ്ഥരെയും ഇന്റലിജന്സ് ഓഫിസര്മാരെയും റിക്രൂട്ട് ചെയ്യാനുള്ള പദ്ധതി ആഭ്യന്തര സെക്രട്ടറി യെവെറ്റ് കൂപ്പര് പ്രഖ്യാപിച്ചിരുന്നു. അഭയാര്ഥികളെ ചൂഷണം ചെയ്യുന്ന സംഘടിത ഇമിഗ്രേഷന് ക്രൈം നെറ്റ്വര്ക്കുകള് തകര്ക്കുമെന്നും യെവെറ്റ് കൂപ്പര് പറഞ്ഞു.
യുകെയില് മുന് പ്രധാനമന്ത്രി റിഷി സുനക് നടപ്പിലാക്കിയ റുവാണ്ട പദ്ധതി പ്രധാനമന്ത്രി കീര് സ്റ്റാര്മര് അധികാരമേറ്റ് ദിവസങ്ങള്ക്ക് ശേഷം മരവിപ്പിച്ചതിനെ തുടര്ന്നാണ് ഹോം ഓഫിസ് പുതിയ പദ്ധതികള് നടപ്പിലാക്കുന്നത്.
