'കുട്ടികളുടെ അശ്ലീല ചിത്രങ്ങള് കാണുന്നതും സൂക്ഷിക്കുന്നതും കുറ്റകരം'; സുപ്രധാന വിധിയുമായി സുപ്രീംകോടതി
കുട്ടികളുടെ അശ്ലീല വീഡിയോകള് ഡൗണ്ലോഡ് ചെയ്ത് കാണുന്നതും സൂക്ഷിക്കുന്നതും പോക്സോ നിയമപ്രകാരം കുറ്റകരം ആണെന്ന നിര്ണായക വിധിയുമായി സുപ്രീംകോടതി. കുട്ടികളുടെ അശ്ളീല വിഡിയോകള് ഡൗണ്ലോഡ് ചെയ്ത് കാണുന്നത് പോക്സോ നിയമ പ്രകാരവും ഐടി ആക്ട് പ്രകാരവും കുറ്റകരം അല്ലെന്ന് മദ്രാസ് ഹൈക്കോടതി വിധിച്ചിരുന്നു. ഈ ഉത്തരവ് റദ്ദാക്കികൊണ്ടാണ് ചീഫ് ജസ്റ്റിസ് ഡിവൈ ചന്ദ്രചൂഡ് അധ്യക്ഷനായ ബെഞ്ചിന്റെ സുപ്രധാന വിധി പ്രസ്താവം.
ദൃശ്യങ്ങള് കാണുന്ന വ്യക്തിക്ക് മറ്റ് ലാഭ ലക്ഷ്യങ്ങള് ഉണ്ടെങ്കില് പോക്സോ നിയമ പ്രകാരം കുറ്റകരം ആകുമെന്നാണ് സുപ്രീംകോടതി വ്യക്തമാക്കിയത്. കുട്ടികളുടെ അശ്ലീല ദൃശ്യങ്ങള് ലഭിച്ചാല് അത് പൊലീസിനെ അറിയിക്കാതിരിക്കുന്നത് കുറ്റകരം ആണെന്നും സുപ്രീം കോടതി വ്യക്തമാക്കി.
ചൈല്ഡ് പോണോഗ്രഫി എന്ന പദത്തിന് പകരം ചൈല്ഡ് സെക്ഷ്വല് ആന്ഡ് എക്സ്പ്ളോറ്റീവ് ആന്ഡ് അബ്യൂസ് മെറ്റീരിയല് എന്ന പ്രയോഗം കൊണ്ട് വരാന് സുപ്രീംകോടതി കേന്ദ്ര സര്ക്കാരിനോട് നിര്ദേശിച്ചു. ഇതിനായി ഓര്ഡിനന്സ് ഉടന് കൊണ്ടുവരണമെന്നും സുപ്രീംകോടതി കേന്ദ്ര സര്ക്കാരിനോട് ആവശ്യപ്പെട്ടു.
