കൊച്ചി: സിറോ മലബാര് സഭാംഗവും ചങ്ങനാശേരി അതിരൂപതയില് നിന്നുള്ള മോണ്സിഞ്ഞോറുമായ ജോര്ജ് കൂവക്കാടിനെ ഫ്രാന്സിസ് മാര്പാപ്പ കര്ദിനാള് പദവിയിലേക്ക് ഉയര്ത്തി. വത്തിക്കാനില് നടന്ന ചടങ്ങിലാണ് ഫ്രാന്സിസ് മാര്പാപ്പയുടെ പ്രഖ്യാപനം. വത്തിക്കാന് പൊതുകാര്യങ്ങള്ക്കു വേണ്ടിയുള്ള വിഭാഗത്തിലാണ് നിയമനം. മോണ്സിഞ്ഞോര് ജോര്ജ് കൂവക്കാട് ഉള്പ്പെടെ 20 പുതിയ കര്ദിനാള്മാരെ മാര്പാപ്പ പ്രഖ്യാപിച്ചു.
ചങ്ങനാശേരി മാമ്മൂട്ട് ലൂര്ദ് പള്ളി ഇടവകാംഗമാണ് മോണ്സിഞ്ഞോര് ജോര്ജ് കൂവക്കാട്. ഡിസംബര് എട്ടിനാണ് സ്ഥാനാരോഹണം. 2006 മുതല് വത്തിക്കാന് നയതന്ത്ര വിഭാഗത്തില് പ്രവര്ത്തിക്കുന്നു. മാര്പാപ്പയുടെ യാത്രകളില് ഉള്പ്പെടെ അനുഗമിക്കുന്ന ഔദ്യോഗിക സംഘത്തില് അംഗമാണ്.
അള്ജീരിയ, ദക്ഷിണ കൊറിയ - മംഗോളിയ, ഇറാന്, കോസ്തറിക്കാ തുടങ്ങിയ സ്ഥലങ്ങളില് മോണ്. ജോര്ജ് അപ്പസ്തോലിക് നുണ്ഷ്യേച്ചറിന്റെ സെക്രട്ടറിയായി സേവനം ചെയ്തിട്ടുണ്ട്.
മോണ്. ജോര്ജ് 2004 ല് പുരോഹിതനായി അഭിഷിക്തനായി. കുറിച്ചി സെന്റ് തോമസ് മൈനര് സെമിനാരിയിലും മംഗലപ്പുഴ സെന്റ് ജോസഫ് പൊന്തിഫിക്കല് സെമിനാരിയിലും റോമിലെ ഹോളി ക്രോസ് യൂണിവേഴ്സിറ്റിയിലും വൈദിക പഠനം പൂര്ത്തിയാക്കിയത്. എസ്. ബി. കോളേജ് പൂര്വ വിദ്യാര്ത്ഥിയുമായ മോണ്. കൂവക്കാട് റോമിലെ ഹോളി ക്രോസ് യൂണിവേഴ്സിറ്റിയില് നിന്നും കാനന് നിയമത്തില് ഡോക്ടറേറ്റും സ്വന്തമാക്കിയിട്ടുണ്ട്.
