ആര്എസ്എസ്- എഡിജിപി ബന്ധം: അടിയന്തര പ്രമേയ ചര്ച്ചയില് നിന്നും 'സിക്ക്' ലീവെടുത്ത് മുഖ്യമന്ത്രി
തിരുവനന്തപുരം: ആര്എസ്എസ്- എഡിജിപി ബന്ധം സംബന്ധിച്ച് നിയമസഭയില് പ്രതിപക്ഷം നല്കിയ അടിയന്തര പ്രമേയ ചര്ച്ചയില് നിന്ന് വിട്ടു നിന്ന് മുഖ്യമന്ത്രി പിണറായി വിജയന്. തൊണ്ടവേദനയും വിശ്രമവും ആരോപിച്ചാണ് പിണറായി വിട്ടു നിന്നത്. നിയമസഭ സമ്മേളനം ആരംഭിച്ചപ്പോള് രണ്ടു മണിക്കൂര് അടിയന്തര പ്രമേയ ചര്ച്ചക്ക് മുഖ്യമന്ത്രി സമ്മതിച്ചിരുന്നു.
12 മണിക്ക് ചര്ച്ച ആരംഭിച്ചപ്പോള് മുഖ്യമന്ത്രിക്ക് തൊണ്ട വേദനയും പനിയുമാണെന്നും ഡോക്ടര്മാര് വോയ്സ് റസ്റ്റ് നിര്ദേശിച്ചുവെന്നും മുഖ്യമന്ത്രി പങ്കെടുക്കില്ലെന്നും സ്പീക്കര് എ.എന് ഷംസീര് അപ്രതീക്ഷിതമായി അറിയിക്കുകയായിരുന്നു. മുഖ്യമന്ത്രിയുടെ അസാന്നിധ്യം ചര്ച്ചക്കിടെ എന് ഷംസുദ്ദീന് എംഎല്എ ഉന്നയിച്ചപ്പോള് സ്പീക്കര് ക്ഷോഭിച്ചു. സ്പീക്കര് എഎന് ഷംസീറും പ്രതിപക്ഷ എംഎല്എ എന് ഷംസുദ്ദീനും തമ്മില് ഇതുസംബന്ധിച്ച് വാഗ്വാദവും നടന്നു. രാവിലെ നിയമസഭയില് സംസാരിച്ച മുഖ്യമന്ത്രിക്ക് പെട്ടെന്ന് അനാരോഗ്യം വന്നത് യാദൃശ്ഛികമാണ് എന്നായിരുന്നു പ്രതിപക്ഷ ആരോപണം. ഇന്ന് മുഖ്യമന്ത്രിക്ക് അനാരോഗ്യം വന്നത് യാദൃശ്ചികമായിരിക്കാമെന്ന് എന് ഷംസുദ്ദീന് പറഞ്ഞപ്പോള് ആര്ക്കും അസുഖം വരാമല്ലോ അത്തരം സംസാരം വേണ്ടെന്നും സ്പീക്കര് രൂക്ഷമായി പ്രതികരിച്ചു.
ഇന്ന് തന്നെ മുഖ്യമന്ത്രിക്ക് അസുഖം വന്നല്ലോ എന്നും ഷംസുദ്ദീന് പരിഹസിച്ചതോടെ ഭരണപക്ഷ എംഎല്എമാര് ബഹളമുണ്ടാക്കുകയായിരുന്നു. മുഖ്യമന്ത്രിയെ കളിയാക്കിയത് അല്ലെന്നും അസുഖം ആര്ക്കും വരാമെന്നും ഇത്രയും പ്രധാനപ്പെട്ട ചര്ച്ചയിലെ മുഖ്യമന്ത്രിയുടെ അസാന്നിധ്യം ചൂണ്ടികാണിക്കുകയായിരുന്നുവെന്നും ഷംസുദ്ദീന് പ്രതികരിച്ചു. 12 മണി മുതല് 2 മണിക്കൂര് ചര്ച്ചയ്ക്കാണ് അനുമതി നല്കിയിരിക്കുന്നത്. അനുമതി നല്കിയ മുഖ്യമന്ത്രി ഇന്നലത്തെ സാഹചര്യം ആവര്ത്തിക്കരുതെന്നും പ്രതിപക്ഷത്തോട് പറഞ്ഞു.
