കണ്ണൂര് എഡിഎം ആയിരുന്ന നവീന് ബാബുവിന്റെത് ആത്മഹത്യ തന്നെയാണെന്ന് പോസ്റ്റ്മോര്ട്ടം റിപ്പോര്ട്ട്. റിപ്പോര്ട്ട് പൊലീസിന് കൈമാറി. നവീന് ബാബുവിന്റെ ശരീരത്തില് മുറിവുകളോ മറ്റ് പാടുകളോ ഇല്ലെന്നും ആത്മഹത്യ തന്നെയാണെന്നും റിപ്പോര്ട്ട് വ്യക്തമാക്കുന്നു. എന്നാല് കൃത്യമായ മരണ സമയം റിപ്പോര്ട്ടില് ഇല്ല. ഏകദേശം പുലര്ച്ചെ 4.30നും 5.30നും ഇടയിലാണ് മരണം സംഭവിച്ചിരിക്കുക എന്നാണ് റിപ്പോര്ട്ട്.
കഴുത്തില് കയര് മുറുകിയാണ് മരണം സംഭവിച്ചതെന്ന് ഇന്ക്വസ്റ്റ് റിപ്പോര്ട്ടിലുണ്ടായിരുന്നു. ശരീരത്തില് മറ്റ് മുറിവുകളോ മറ്റൊരാളുടെ സാന്നിധ്യമോ സംശയിക്കാവുന്ന മറ്റ് ഘടകങ്ങളോ ഇല്ലെന്നും ഇന്ക്വസ്റ്റ് റിപ്പോര്ട്ടില് സൂചനയുണ്ടായിരുന്നു. സംഭവ ദിവസം പുലര്ച്ചെ 4.58ന് നവീന് കളക്ടറേറ്റിലെ രണ്ട് ഉദ്യോഗസ്ഥര്ക്ക് സന്ദേശം അയച്ചിരുന്നു. ഭാര്യയുടെയും മകളുടെയും ഫോണ് നമ്പറായിരുന്നു അയച്ചത്. എന്നാല് നവീന്റെ മരണ വിവരം പുറത്തുവന്നതിന് ശേഷമാണ് ഇരുവരും സന്ദേശം കണ്ടത്.
ആത്മഹത്യാക്കുറിപ്പും ലഭിച്ചിട്ടില്ല. റെയില്വേ സ്റ്റേഷന് പരിസരത്തെ സിസിടിവി ക്യാമറ ദൃശ്യങ്ങളും നവീന് ബാബുവിന്റെ ഫോണ് ലൊക്കേഷനും പരിശോധിച്ചിരുന്നെങ്കിലും റെയില്വേ സ്റ്റേഷനിലെ സിസിടിവി പരിശോധിച്ചിട്ടില്ല.
മരണം സംഭവിച്ച് ഒരാഴ്ച പിന്നിട്ടും പോസ്റ്റ്മോര്ട്ടം റിപ്പോര്ട്ട് ബന്ധുക്കള്ക്ക് നല്കിയില്ലെന്ന് വിമര്ശനമുണ്ട്. അതുകൊണ്ട് തന്നെ മരണസമയത്തെക്കുറിച്ച് സൂചനകള് മാത്രമേയുള്ളു. പോസ്റ്റ്മോര്ട്ടം റിപ്പോര്ട്ടിനെ കുറിച്ച് അന്വേഷിച്ചപ്പോള് കോടതി വഴി ലഭിക്കുമെന്നുള്ള വിവരമാണ് ലഭിച്ചതെന്നാണ് ബന്ധുക്കള് അറിയിച്ചത്.
നവീന് ബാബു ചെങ്ങളായിലെ പെട്രോള് പമ്പിന് എന്ഒസി നല്കിയത് നിയമപരമായെന്ന് ലാന്ഡ് റവന്യൂ ജോയിന്റ് കമ്മീഷണര് കണ്ടെത്തിയിട്ടുണ്ട്. ഫയല് വൈകിപ്പിച്ചതിനോ കൈക്കൂലി വാങ്ങിയതിനോ തെളിവില്ലെന്നും കണ്ടെത്തി.
