2025 ലെ ഏറ്റവും ശക്തമായ പാസ്പോര്ട്ടുകളുടെ പട്ടിക പുറത്തു വന്നപ്പോള്, 195 സ്ഥലങ്ങള് വിസയില്ലാതെ സന്ദര്ശിക്കാന്, ഉടമകളെ സഹായിക്കുന്ന സിംഗപ്പൂര് പാസ്പോര്ട്ട് ഒന്നാം സ്ഥാനത്ത് എത്തി.
193 രാജ്യങ്ങളിലേക്ക് വിസ ഫ്രീ സന്ദര്ശനം ഉറപ്പ് നല്കുന്ന ജപ്പാന് പാസ്സ്പൊര്ട്ടാണ് പട്ടികയില് രണ്ടാം സ്ഥാനത്ത് ഉള്ളത്. 192 രാജ്യങ്ങളിലേക്കുള്ള വിസ ഫ്രീ സന്ദര്ശനം ഉറപ്പാക്കുന്ന ഫിന്ലാന്ഡ്, ഫ്രാന്സ്, ജര്മ്മനി, ഇറ്റലി, സ്പെയിന്, ദക്ഷിണ കൊറിയ എന്നീ രാജ്യങ്ങളുടെ പാസ്സ്പോര്ട്ടുകള് മൂന്നാം സ്ഥാനത്തും ഉണ്ട്.
ഇതില് ഫ്രാന്സ്, ജര്മ്മനി, ഇറ്റലി, സ്പെയിന് എന്നിവര് കഴിഞ്ഞ വര്ഷത്തെ അപേക്ഷിച്ച് താഴോട്ട് വന്നിരിക്കുകയാണ്. ആസ്ട്രിയ, ഡെന്മാര്ക്ക്, അയര്ലന്ഡ്, ലക്സംബര്ഗ്, നെതെര്ലന്ഡ്സ്, നോര്വേ, സ്വീഡന് എന്നീ ഏഴ് രാജ്യങ്ങളിലെ പാസ്സ്പോര്ട്ട് ഉപയോഗിച്ച് 191 രാജ്യങ്ങളില് മുന്കൂര് വിസ ഇല്ലാതെ സന്ദര്ശനം നടത്താം. ഈ ഏഴ് യൂറോപ്യന് യൂണിയന് രാജ്യങ്ങള് ലിസ്റ്റില് നാലാം സ്ഥാനത്ത് എത്തി.
ഈ വര്ഷം അഞ്ചാം സ്ഥാനത്താണ് ബ്രിട്ടന്റെ സ്ഥിതി. ബെല്ജിയം, ന്യൂസിലാന്ഡ്, സ്വിറ്റ്സര്ലാന്ഡ്, പോര്ച്ചുഗല് എന്നീ രാജ്യങ്ങളിലെ പൗരന്മാര്ക്കൊപ്പം ബ്രിട്ടീഷുകാര്ക്കും 190 ഇടങ്ങള് വിസയില്ലാതെ സന്ദര്ശിക്കാം.
കഴിഞ്ഞ വര്ഷം ഈ പട്ടികയില് ഏഴാം സ്ഥാനത്ത് ഉണ്ടായിരുന്ന അമേരിക്ക ഇപ്പോള് ഒന്പതാം സ്ഥാനത്താണ്. 186 രാജ്യങ്ങളിലാണ് അമേരിക്കന് പാസ്പോര്ട്ട് ഉപയോഗിച്ച് വിസ ഫ്രീ സന്ദര്ശനം നടത്താന് കഴിയുക. 2014 ല് അമേരിക്കയായിരുന്നു ഈ പട്ടികയില് ഒന്നാം സ്ഥാനത്ത് ഉണ്ടായിരുന്നത്. ഒരു പതിറ്റാണ്ടിനിടയില് മൂന്ന് സ്ഥാനങ്ങള് താഴോട്ടുപോയ കാനഡ ഏഴാം സ്ഥാനത്താന്. അതേസമയം ആസ്ട്രേലിയ കഴിഞ്ഞ വര്ഷത്തേത് പോലെ ഈ വര്ഷവും ആറാം സ്ഥാനം നിലനിര്ത്തി. 189 രാജ്യങ്ങളാണ് ആസ്ട്രേലിയന് പാസ്സ്പോര്ട്ട് ഉപയോഗിച്ച് വിസ ഫ്രീ സന്ദര്ശനം നടത്താന് കഴിയുക.
ഇന്റര്നാഷണല് ട്രാന്സ്പോര്ട്ട് അസ്സോസിയേഷനില് നിന്നുള്ള വിവരങ്ങളുടെ അടിസ്ഥാനത്തിലാണ് ഹെന്ലി പാസ്സ്പോര്ട്ട് സൂചിക തയ്യാറാക്കിയിരിക്കുന്നത്. ഒരു പാസ്സ്പോര്ട്ട് ഉടമയ്ക്ക് തന്റെ പാസ്സ്പോര്ട്ടുമായി എത്ര രാജ്യങ്ങളില് മുന്കൂര് വിസ ഇല്ലാതെ സഞ്ചരിക്കാന് കഴിയും എന്ന കാര്യമാണ് ഇതിനായി വിശകലനം ചെയ്യുന്നത്. കഴിഞ്ഞ പത്തു വര്ഷക്കാലത്തിനിടയില് വന് കുതിപ്പ് നടത്തിയത് യു എ ഇ ആണ്. 2015 ല് ഉണ്ടായിരുന്നതിനേക്കാള് 72 രാജ്യങ്ങളിലേക്കാണ് ഇപ്പോള് യു എ ഇ പാസ്സ്പോര്ട്ട് ഉള്ളവര്ക്ക് കൂടുതലായി യാത്ര ചെയ്യാന് കഴിയുക. യു എ ഇല് ലിസ്റ്റില് പത്താം സ്ഥാനത്താണ്. 185 രാജ്യങ്ങളിലേക്ക് ഈ പാസ്സ്പോര്ട്ട് ഉള്ളവര്ക്ക് വിസ ഫ്രീ യാത്ര സാധ്യമാകും.
57 രാജ്യങ്ങളിലേക്ക് വിസ ഫ്രീ യാത്ര സാധ്യമാക്കുന്ന പാസ്സ്പോര്ട്ടുമായി ഇന്ത്യ എണ്പത്തിയഞ്ചാം സ്ഥാനത്ത് എത്തിയപ്പോള്, 33 രാജ്യങ്ങളുമായി പാകിസ്ഥാന് നൂറ്റിനാലാം സ്ഥാനത്താണ്.
പട്ടികയില് ഏറ്റവും അവസാനത്തേത് അഫ്ഗാനിസ്ഥാനാണ്. കഴിഞ്ഞ വര്ഷം 28 രാജ്യങ്ങളിലേക്ക് അഫ്ഗാന് പാസ്സ്പോര്ട്ട് ഉപയോഗിച്ച് വിസ ഫ്രീ സന്ദര്ശനം നടത്താന് കഴിയുമായിരുന്നെങ്കില് ഈ വര്ഷം അത് 26 ആയി കുറഞ്ഞിട്ടുമുണ്ട്. ഇതില് ഒന്നാം സ്ഥനത്തുള്ള രാജ്യവും അവസാന സ്ഥാനത്തുള്ള രാജ്യവും തമ്മില് വിസ ഫ്രീ സന്ദര്ശനം നടത്താന് സാധിക്കുന്ന രാജ്യങ്ങളുടെ എണ്ണത്തില് ഇത്രയും വലിയ വ്യത്യാസം വരുന്നത് സൂചികയുടെ 19 വര്ഷത്തെ ചരിത്രത്തില് ആദ്യമായിട്ടാണ്.
