ബ്രിട്ടനിലേക്ക് വീണ്ടും കൊടുംതണുപ്പ് തിരിച്ചെത്തുന്നു. വീക്കെന്‍ഡില്‍ താപനില വീണ്ടും കുത്തനെ താഴുന്നതോടെ ഇംഗ്ലണ്ടില്‍ പകല്‍ സമയങ്ങളില്‍ പരമാവധി ഉയര്‍ന്ന താപനില 5 സെല്‍ഷ്യസായിരിക്കും. രാത്രി കാലങ്ങളില്‍ താപനില പൂജ്യത്തിന് താഴേക്ക് പോകുമെന്നാണ് സൂചന.
ഇന്ന് യുകെയില്‍ ഏറ്റവും മെച്ചപ്പെട്ട താപനില രേഖപ്പെടുത്തുന്നത് നോര്‍ത്തേണ്‍ സ്‌കോട്ട്‌ലണ്ടില്‍ ആയിരിക്കുമെന്ന് മെറ്റ് ഓഫീസ് വ്യക്തമാക്കി. ചൊവ്വാഴ്ച 16 സെല്‍ഷ്യസ് വരെ ശരാശരി താപനില ഉയര്‍ന്ന ശേഷമാണ് ഈ തിരിച്ചുപോക്ക്. വീക്കെന്‍ഡില്‍ ഇംഗ്ലണ്ടിലും, വെയില്‍സിലും തണുപ്പേറുകയാണ് ചെയ്യുക. ശനി, ഞായര്‍ ദിവസങ്ങളില്‍ 3 സെല്‍ഷ്യസിനും, 6 സെല്‍ഷ്യസിനും ഇടയിലാണ് ശരാശരി താപനില നിലകൊള്ളുക.
2010ന് ശേഷം ആദ്യമായി യുകെ ജനുവരിയിലെ ഏറ്റവും തണുപ്പേറിയ രാത്രിയെ നേരിട്ടത് കഴിഞ്ഞ വീക്കെന്‍ഡിലാണ്, സ്‌കോട്ട്‌ലണ്ടില്‍ ശക്തമായ മഞ്ഞുവീഴ്ചയ്ക്കിടെ താപനില -19 സെല്‍ഷ്യസിലേക്കാണ് താഴ്ന്നത്. ഈ ശനിയാഴ്ച ഇംഗ്ലണ്ടിലും, വെയില്‍സിലും ഉയര്‍ന്ന താപനില 3 സെല്‍ഷ്യസ് മുതല്‍ 5 സെല്‍ഷ്യസ് വരെ മാത്രമാകുമെന്നാണ് കരുതുന്നത്. സൗത്ത് വെസ്റ്റില്‍ ഇത് 8 സെല്‍ഷ്യസും, സ്‌കോട്ട്‌ലണ്ടില്‍ 9 സെല്‍ഷ്യസുമാകും ഉയര്‍ന്ന താപനില.
ശനിയാഴ്ച രാത്രിയോടെ നോര്‍ത്ത് ഇംഗ്ലണ്ടില്‍ താപനില -2 സെല്‍ഷ്യസിലേക്ക് വീഴും. രാജ്യത്തിന്റെ മറ്റ് ഭാഗങ്ങളില്‍ ഇത് 0 സെല്‍ഷ്യസ് മുതല്‍ 3 സെല്‍ഷ്യസ് വരെയായിരിക്കും. ഞായറാഴ്ച പകല്‍ സമയങ്ങളില്‍ ഇംഗ്ലണ്ടിലെ ഭൂരിഭാഗം ഇടങ്ങളില്‍ 3 സെല്‍ഷ്യസ് മുതല്‍ 6 സെല്‍ഷ്യസ് വരെ ഉയര്‍ന്ന താപനില രേഖപ്പെടുത്തുമ്പോള്‍ സൗത്ത് വെസ്റ്റ്, സ്‌കോട്ട്‌ലണ്ട് എന്നിവിടങ്ങളില്‍ 9 സെല്‍ഷ്യസും, നോര്‍ത്തേണ്‍ അയര്‍ലണ്ടില്‍ 10 സെല്‍ഷ്യസും അനുഭവപ്പെടും.
