കോവിഡ് വാക്‌സിനുകള്‍ക്കു ദൂഷ്യ ഫലങ്ങള്‍ ഉണ്ടെന്ന തരത്തില്‍ ലോക വ്യാപകമായി ആശങ്കകള്‍ പങ്കുവയ്ക്കപ്പെടുന്നുണ്ട്. ബ്രിട്ടനില്‍ മാത്രം കോവിഡ് വാക്‌സിന്‍ സ്വീകരിച്ചത് മൂലം പരുക്കേല്‍ക്കുകയോ, പ്രിയപ്പെട്ടവര്‍ ആരെങ്കിലും മരിക്കുകയോ ചെയ്തതായി റിപ്പോര്‍ട്ട് ചെയ്തവരുടെ എണ്ണം 17,000 കടന്നതായാണ് ഏറ്റവും പുതിയ ഗവണ്‍മെന്റ് ഡാറ്റ വ്യക്തമാക്കുന്നത്.
വാക്‌സിനുകള്‍ മൂലം അപകടം പറ്റിയവര്‍ക്ക് നഷ്ടപരിഹാരം ലഭിക്കുമെന്ന് മന്ത്രിമാര്‍ വാഗ്ദാനം ചെയ്തിട്ടുണ്ടെങ്കിലും ഔദ്യോഗിക വാക്‌സിന്‍ ഡാമേജ് പേയ്‌മെന്റ് സ്‌കീം പ്രകാരം കേവലം 194 പേര്‍ക്കാണ് ഇത് ലഭിച്ചത്.
എംആര്‍എന്‍എ വാക്‌സിനുകളുമായി ബന്ധപ്പെട്ട ഭയപ്പെടുത്തുന്ന സിന്‍ഡ്രോം കണ്ടെത്തിയ യേല്‍ യൂണിവേഴ്‌സിറ്റിയിലെ യുഎസ് ശാസ്ത്രജ്ഞരാണ് ഞെട്ടല്‍ സമ്മാനിക്കുന്നത്. ബ്രിട്ടനില്‍ ഏറ്റവും വ്യാപകമായി ഉപയോഗിച്ച ഫിസര്‍, മോഡേണ വാക്‌സിനുകള്‍ ഈ രീതിയില്‍ നിര്‍മ്മിച്ചവയാണ്.
ബ്രെയിന്‍ ഫോഗ്, തലചുറ്റല്‍, ചെവിയില്‍ തുടര്‍ച്ചയായുള്ള മൂളല്‍, വ്യായാമം ചെയ്യാനുള്ള ബുദ്ധിമുട്ട് എന്നിവയാണ് 'പോസ്റ്റ്-വാക്‌സിനേഷന്‍ സിന്‍ഡ്രോമില്‍' ഗവേഷകര്‍ റിപ്പോര്‍ട്ട് ചെയ്തത്. ചില ആളുകളില്‍ സുപ്രധാനമായ ബയോളജിക്കല്‍ മാറ്റങ്ങളും കണ്ടെത്തിയിട്ടുണ്ട്. ഇമ്മ്യൂണ്‍ സെല്ലുകളിലെ മാറ്റങ്ങള്‍, രക്തത്തില്‍ കൊറോണാവൈറസ് പ്രോട്ടീനുകളുടെ സാന്നിധ്യം എന്നിവയാണ് വര്‍ഷങ്ങള്‍ക്ക് ശേഷവും നിലകൊള്ളുന്നത്.
കൂടാതെ അധികം ചലനമില്ലാതെ കിടന്നിരുന്ന എപ്സ്റ്റീന്‍ ബാര്‍ വൈറസുകളുടെ തിരിച്ചുവരവിനും ഈ അവസ്ഥ കാരണമാകുന്നുണ്ട്. പഠനത്തിന്റെ പൂര്‍ണ്ണ വിവരങ്ങള്‍ ഇപ്പോഴും പുറത്തുവിട്ടിട്ടില്ല.
