വരുന്ന വാരാന്ത്യത്തില്‍ യുകെയില്‍ ശക്തമായ കാറ്റും തണുപ്പും ഉണ്ടാവുമെന്ന് മെറ്റ് ഓഫീസ് മുന്നറിയിപ്പ്. മണിക്കൂറില്‍ 70 മൈല്‍ വേഗത്തില്‍ വരെ കാറ്റടിക്കുമെന്ന് മുന്നറിയിപ്പ് ഉണ്ട്. ഞായറാഴ്ച രാവിലെയോടെ ശക്തി പ്രാപിക്കുന്ന തെക്കന്‍ കാറ്റും, തെക്ക് പടിഞ്ഞാറന്‍ കാറ്റും മണിക്കൂറില്‍ 50 മുതല്‍ 60 മൈല്‍ വരെ വേഗത കൈവരിക്കുമെന്നും, ചിലപ്പോള്‍ മണിക്കൂറില്‍ 70 മൈല്‍ വേഗതയും കൈവരിച്ചേക്കുമെന്നാണ് മുന്നറിയിപ്പില്‍ പറയുന്നത്. സ്‌കോട്ട്‌ലാന്‍ഡ്, വെയ്ല്‍സ്, ഇംഗ്ലണ്ടിലെ ചില ഭാഗങ്ങള്‍ എന്നിവിടങ്ങളില്‍ മഞ്ഞ മുന്നറിയിപ്പും പ്രഖ്യാപിച്ചിട്ടുണ്ട്.
വടക്ക് കിഴക്കന്‍ ഇംഗ്ലണ്ട്, വടക്ക് പടിഞ്ഞാറന്‍ ഇംഗ്ലണ്ട്,. പടിഞ്ഞാറന്‍ മിഡ്‌ലാന്‍ഡ്‌സ്, തെക്ക് പടിഞ്ഞാറന്‍ ഇംഗ്ലണ്ട്, യോര്‍ക്ക്ഷയറിലെ പല ഭാഗങ്ങള്‍ എന്നിവിടങ്ങളിലൊക്കെ ഈ മുന്നറിയിപ്പ് നിലവിലുണ്ട്. ഡെര്‍ബിഷയര്‍, സ്റ്റഫോര്‍ഡ്ഷയര്‍, വാര്‍വിക്ഷയര്‍ എന്നിവിടങ്ങള്‍ ഉള്‍പ്പടെ 98 പ്രദേശങ്ങളില്‍ ഇത് ബാധകമാവും. തുറസായ പ്രദേശങ്ങളിലും ഉയര്‍ന്ന പ്രദേശങ്ങളിലും കാറ്റ് കൂടുതല്‍ ശക്തിയാര്‍ജ്ജിക്കും എന്നും മുന്നറിയിപ്പില്‍ പറയുന്നു.
പലയിടങ്ങളിലും ഗതാഗത തടസവും വൈദ്യുതി വിതരണത്തിലെ തടസവും ഉണ്ടാകാം. ഐറിഷ് കടല്‍ത്തീരം, സ്‌കോട്ടിഷ് ദ്വീപുകള്‍ എന്നിവിടങ്ങളിലായിരിക്കും ഇത് കൂടുതലായി അനുഭവപ്പെടുക. ശക്തമായ കാറ്റിനു പുറകെ മഴയും എത്തും. ഇതോടെ റോഡുകളില്‍ ഗതാഗത കുരുക്ക് ഉണ്ടാകാനും ഇടയുണ്ട്.
