ബെല്ഫാസ്റ്റ്: ഇന്ത്യക്കാരുടെ എണ്ണം അതിവേഗം കൂടുന്ന വടക്കന് അയര്ലന്ഡില് പുതിയ ഇന്ത്യന് കോണ്സുലേറ്റ്. ഇവിടെ ഇന്ത്യന് ജനതയുടെ എണ്ണം വര്ധിക്കുന്ന സാഹചര്യത്തില് മികച്ച സേവനം നല്കുക എന്ന ലക്ഷ്യത്തോടെയാണ് ബെല്ഫാസ്റ്റില് പുതിയ ഇന്ത്യന് കോണ്സുലേറ്റ് തുറന്നത്.
മികച്ച സേവനം നല്കുകയാണ് ഇന്ത്യന് കോണ്സുലേറ്റിന്റെ മുന്ഗണനയെന്ന് ഇന്ത്യന് വിദേശകാര്യ മന്ത്രി ഡോ. എസ് ജയശങ്കര് പറഞ്ഞു. ബെല്ഫാസ്റ്റില് പുതിയ ഇന്ത്യന് കോണ്സുലേറ്റ് ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. ബെല്ഫാസ്റ്റ് സിറ്റി ഹാളിനു സമീപം ക്ലാരന്സ് ഹൗസില് മൂന്നു നിലകളിലായി 60ല് പരം ഇരിപ്പിടങ്ങളുമായാണ് പുതിയ കോണ്സുലേറ്റ് പ്രവര്ത്തനം ആരംഭിക്കുന്നത്.
ലോകമെങ്ങും നോക്കിയാല് ഇന്ത്യ - യുകെ ബന്ധം കൂടുതല് ശക്തമാകുന്നതു കാണാനാകും. പുതിയ സര്ക്കാര് നയരൂപീകരണ സമയത്തു തന്നെ ഇന്ത്യന് ജനത ഇവിടെ വര്ധിച്ചു വരുന്നതു മനസിലാക്കുകയും ഇവിടെ കോണ്സുലേറ്റ് സ്ഥാപിക്കുന്നത് തീരുമാനിക്കുകയും ചെയ്തിരുന്നതാണ്.
യുകെയ്ക്കും യൂറോപ്യന് യൂണിയനും ഇടയിലുള്ള ഭൂപ്രദേശം എന്ന നിലയില് പുതിയ കോണ്സുലേറ്റ് ഏറെ നിര്ണായകമാണ്. ബ്രിട്ടനെ യൂറോപ്യന് യൂണിയനുമായി ബന്ധിപ്പിക്കുന്ന കേന്ദ്രമായി പ്രവര്ത്തിക്കാനും കോണ്സുലേറ്റിനു സാധിക്കും. രാജ്യങ്ങളുമായുള്ള ബന്ധം വര്ധിക്കുന്നത് വാണിജ്യ, വ്യവസായ, വിദ്യാഭ്യാസ സാധ്യതകളെ ഉയര്ത്തുന്നുണ്ട്.
നോര്ത്തേണ് അയര്ലന്ഡുമായുള്ള ബന്ധം കൂടുതല് സുദൃഢമാക്കും. ഉല്പാദനത്തില് ചരിത്രപ്രാധാന്യമുള്ള യുകെയുടെ ഭാഗമാണ് ഈ രാജ്യം. ഇവിടെ നിരവധി വ്യവസായ സാന്നിധ്യങ്ങളും കപ്പല് നിര്മാണവും സജീവമായി നടക്കുന്നുണ്ട്. അതേ സമയം തന്നെ ഐടി കമ്പനികളുടെ സാന്നിധ്യവും എടുത്തു പറയേണ്ടതാണ്. ഇവിടെയുള്ള ക്വീന്സ് യൂണിവേഴ്സിറ്റി ഇന്ത്യയില് കേന്ദ്രം സ്ഥാപിക്കുന്ന വിവരവും മന്ത്രി ചൂണ്ടിക്കാട്ടി.
രാജ്യങ്ങള് തമ്മിലുള്ള സാമ്പത്തിക സഹകരണം വര്ധിക്കുന്നത് യാത്രകള് എളുപ്പമാകുന്നതിനു സാഹചര്യമൊരുക്കും. ഇന്ത്യന് സമൂഹത്തിനു കൂടുതല് സഹായകരമായ തീരുമാനങ്ങളുണ്ടാകും. വിദ്യാഭ്യാസം മെച്ചപ്പെടും ഇതെല്ലാം ഗുണകരമായിരിക്കും.
ബെല്ഫാസ്റ്റിന്റെ ചരിത്രം പരിശോധിച്ചാല് കോണ്സുലേറ്റ് തുറക്കുന്നത് നല്ല തീരുമാനമാണെന്നും അദ്ദേഹം പറഞ്ഞു. കഴിഞ്ഞ നാലിനു യുകെയില് എത്തിയ മന്ത്രി 9നു മടങ്ങും.
കഴിഞ്ഞ ജി20 സമ്മിറ്റിലാണ് യുകെയില് പുതിയതായി രണ്ട് ഇന്ത്യന് കോണ്സുലേറ്റുകള് സ്ഥാപിക്കുമെന്ന് പ്രധാനമന്ത്രി നരേന്ദ്രമോദി പ്രഖ്യാപിച്ചത്. നിലവില് നോര്ത്തേണ് അയര്ലന്ഡിലെ ഇന്ത്യന് സമൂഹം ലണ്ടന് കോണ്സുലേറ്റില് നിന്നുള്ള സേവനങ്ങളാണ് ഉപയോഗിക്കുന്നത്. ബെല്ഫാസ്റ്റ് വിഎഫ്എസ് വഴിയുള്ള പരിമിതമായ സേവനം
മതിയാകാതെ വന്നതോടെ കോണ്സുലേറ്റ് എന്ന ആവശ്യവും ശക്തമായി ഉയര്ന്നിരുന്നു. വരും ദിവസങ്ങളില് കോണ്സുലേറ്റ് പ്രവര്ത്തനം സജീവമാകുന്നതോടെ പാസ്പോര്ട് ഉള്പ്പെടെയുള്ള രേഖകള് കാലതാമസമില്ലാതെ ലഭ്യമാകുമെന്ന പ്രതീക്ഷയാണുള്ളത്. അതേ സമയം ആരായിരിക്കും ബെല്ഫാസ്റ്റ് കോണ്സല് ജനറല് എന്ന കാര്യത്തില് പ്രഖ്യാപനം ഉണ്ടായിട്ടില്ല. നോര്ത്തേണ് അയര്ലന്ഡ് അസംബ്ലി സ്പീക്കര് എഡ്വിന് പൂട്ട്സ്, ബെല്ഫാസ്റ്റ് മേയര് മിക്ക് മുറെ, ദില്ജിത് റാണ തുടങ്ങിയവര് ചടങ്ങില് പങ്കെടുത്തു.
