കൊച്ചി: വൈറ്റിലയിലെ ഫോര്സ്റ്റാര് ഹോട്ടല് സ്പാ കേന്ദ്രീകരിച്ച് അനാശാസ്യം. വൈറ്റില ആര്ട്ടിക് ഹോട്ടലില് പൊലീസ് നടത്തിയ പരിശോധനയില് 11 യുവതികളും ഇടനിലക്കാരനും പിടിയിലായി. ലഹരി പരിശോധനയ്ക്കിടെയാണ് സ്പായുടെ മറവില് പ്രവര്ത്തിച്ചിരുന്ന അനാശ്യാസ്യ സംഘം പിടിയിലായത്.
വൈറ്റിലയിലെ ഫോര്സ്റ്റാര് ഹോട്ടലായ 'ആര്ട്ടിക്കി'ല് ലഹരി ഇടപാട് നടക്കുന്നുണ്ടെന്ന വിവരത്തിന്റെ അടിസ്ഥാനത്തിലാണ് ഡാന്സാഫും മരട് പൊലീസും ഹോട്ടലില് പരിശോധനയ്ക്കെത്തിയത്. എന്നാല് ലഹരി കണ്ടെത്തിയില്ല, പക്ഷെ വന് പെണ് വാണിഭ സംഘം പൊലീസിന്റെ വലയിലിലായി. ഹോട്ടലിന്റെ മൂന്നാം നിലയിലെ മൂന്ന് മുറികള് വാടകയ്ക്കെടുത്ത് മഞ്ചേരി സ്വദേശി നൗഷാദ് എന്നയാളാണ് സ്പാ നടത്തിയത്. ഇയാളുടെ ഇടനിലക്കാരനായി പ്രവര്ത്തിച്ച കൊച്ചി സ്വദേശി ജോസ് പരിശോധന സമയത്ത് ഹോട്ടലിലുണ്ടായിരുന്നു.
മനേജറായി പ്രവര്ത്തിച്ച യുവതി ഉള്പ്പടെ മലയാളികളായ 11 യുവതികളാണ് പിടിയിലായത്. കൂടുതലും കൊച്ചിക്കാരാണ് പിടിയിലായത്. മാസ ശമ്പളത്തിലാണ് യുവതികളെ നിയമിച്ചിരുന്നത്. മാനേജരായ യുവതിക്ക് 30000 രൂപ, ഇടനിലക്കാരനായ ജോസിന് 20000 രൂപ, മറ്റുള്ളവര്ക്ക് 15000 രൂപ എന്നിങ്ങനെയായിരുന്നു ശമ്പളം. അനാശാസ്യത്തിലൂടെ ലഭിക്കുന്ന വരുമാനം വേറെയും. ഒരു മാസം സ്പായില് നിന്ന് മാത്രം മൂന്നര ലക്ഷം രൂപ വരെ ഇടനിലക്കാര്ക്ക് ലഭിച്ചതായി പൊലീസ് പറഞ്ഞു.
