ഭീഷണിയുടെ സ്വരം മുഴക്കുവരോട് ഒറ്റക്കാര്യമേ പറയാനുള്ളു..; വിവാദങ്ങളില് പ്രതികരിച്ചു നിവിന് പോളി
നിര്മ്മാതാവ് ലിസ്റ്റിന് സ്റ്റീഫന് ഉന്നയിച്ച ആരോപണങ്ങളില് ചര്ച്ചകള് പുരോഗമിക്കുന്നതിനിടെ പ്രതികരിച്ച് നടന് നിവിന് പോളി. കൊട്ടാരക്കര പടിഞ്ഞാറ്റിന്കര ശ്രീമഹാദേവര് ക്ഷേത്രോത്സവ വേദിയില് സംസാരിക്കുകയായിരുന്നതിനിടെയാണ് നിവിന് വിവാദങ്ങളോട് പരോക്ഷമായി പ്രതികരിച്ചത്. സ്വന്തം കാര്യം മാത്രം നോക്കുന്ന, ഭീഷണിയുടെ സ്വരം മുഴക്കുന്നവരെ ജീവിതത്തില് നാം കണ്ടുമുട്ടാറുണ്ട് എന്നായിരുന്നു നിവിന്റെ വാക്കുകള്.
മലയാള സിനിമയിലെ ഒരു പ്രമുഖ നടന് വലിയൊരു തെറ്റിലേക്കാണ് തിരി കൊളുത്തിയിരിക്കുന്നത് എന്ന ലിസ്റ്റിന്റെ വാക്കുകള് വിവാദമായിരുന്നു. ഇതിന് പിന്നാലെ ആ നടന് നിവിന് ആണെന്ന പ്രചാരണങ്ങളും നടന്നിരുന്നു. എന്നാല് നിവിന് അല്ല ആ നടന് എന്ന് ലിസ്റ്റിന് വ്യക്തമാക്കിയിരുന്നു. ഇതിന് പിന്നാലെയാണ് നിവിന്റെ മറുപടി.
കൊട്ടാരക്കര മഹാദേവ ക്ഷേത്രത്തില് നടന്ന ചടങ്ങിലാണ് നിവിന് സംസാരിച്ചത്. 'ഞാന് ഇങ്ങോട്ട് വന്നപ്പോള് കണ്ടത് നല്ല ഹൃദയം ഉണ്ടാവട്ടെ എന്ന ഹോര്ഡിങ്സ് ആണ്. എനിക്ക് എല്ലാവരോടും പറയാനുള്ളത് അതാണ്. നമുക്ക് എല്ലാവര്ക്കും പരസ്പരം സ്നേഹത്തിലും സമാധാനത്തിലും നല്ല ഹൃദയമുള്ള ആളുകളായി ജീവിക്കാന് പറ്റിയാല് വളരെ നല്ല കാര്യമാണ്.'
'അങ്ങനെയുള്ള ഒരുപാട് പേരെ നമ്മുടെ ജീവിതത്തില് കാണാറുണ്ട്. അങ്ങനെ അല്ലാത്തവരെയും നമ്മള് ജീവിതത്തില് അഭിമുഖീകരിക്കേണ്ടി വരാറുണ്ട്. സ്വന്തം കാര്യം മാത്രം നോക്കുന്ന, അല്ലെങ്കില് ഭീഷണിയുടെ സ്വരം മുഴക്കുന്ന ആളുകളെയും നമ്മള് മുന്നില് കാണുന്നുണ്ട്. പക്ഷേ അവരോടെല്ലാം എനിക്ക് ഒറ്റ കാര്യമേ പറയാനുള്ളൂ.'
'നല്ല ഹൃദയത്തിന്റെ, നല്ല മനസിന്റെ ഉടമയാവുക. പരസ്പരം സ്നേഹത്തിലും സന്തോഷത്തിലും മുന്നോട്ട് പോവാനായി നമുക്കെല്ലാവര്ക്കും സാധിക്കും. കഴിഞ്ഞ വര്ഷം എനിക്ക് ഒരു പ്രശ്നം ഉണ്ടായപ്പോള് ഏറ്റവും കൂടുതല് ഒപ്പം നിന്നത് പ്രേക്ഷകരാണ്. ഒരു വേര്തിരിവോ സംശയമോ ഇല്ലാതെ ഒപ്പം നിന്നതിന് എല്ലാവര്ക്കും നന്ദി' എന്നാണ് നിവിന് പോളിയുടെ വാക്കുകള്.
